अझ नं माओवादीयात विश्वास यायेगु आधार मदु : प्रम
प्रधानमन्त्री माधवकुमार नेपालं माओवादीं छगू न्ववाइगु व ज्या याइगु मेगू हे जूगुलिं अझ नं विश्वास यायेगु वातावरण मदुगु खँ धयादीगु दु ।
माओवादी पाखें दायाः घाःपाः जुम्ह ओखलढुंगाया शिक्षक मीनबहादुर खड्काया स्वास्थ्य अवस्थाया बारे जानकारी कायेत शुक्रवाः येँया महाराजगंजय् च्वंगु शिक्षण अस्पतालय् माओवादीयात अझ शंका यायेगु थाय् दुगु खँ धयादीगु खः ।
वय्कलं माओवादीं न्ववाइगु व ज्या याइगु उल्टा जूगुलिं छु आधारय् विश्वास यायेफइगु धासें न्ह्यसः तयादिल । माओवादीयात विश्वासया वातावरण दयेकेत इनाप यानादिसें प्रधानमन्त्री नेपालं छखे सहमतिया खँ ल्हाइगु व मेखे सर्वसाधारण जनतायात सांघातिक आक्रमण याइगु माओवादीया थंज्याःगु व्यवहार नाप सहमति जुइमफइगु धयादिल ।
नेपाल राष्ट्रिय शिक्षक संगठनया दुजः खड्कायात ओखलढुंगाया स्थानीय माओवादी कार्यकर्तातय्सं छुं न्हि न्ह्यः दाःगु खः ।
