अनमिन प्रमुखं प्रचण्ड नापलात
नेपाः स्थित संयुक्त राष्ट्रसंघीय मिसन अनमिन प्रमुख करिन ल्यानग्रेनं एनेकपा (माओवादी)या अध्यक्ष पुष्पकमल दाहाल 'प्रचण्ड' नाप लिप्पांगु राजनीतिक अवस्थाया बारे खँल्हाबला यानादीगु दु ।
शुक्रवाः सुथय् न्हू बजारय् च्वंगु प्रचण्ड निवास थ्यंकाः ल्यानग्रेनं राजनीतिक दलत दथुइ जुयाच्वंगु राजनीतिक सहमतिया कुतः, संविधान निर्माण व सेना समायोजनया बारे च्यूताः प्वंकादीगु खः । वय्कलं माओवादीं आम हड्ताल लितकयाः सहमतिया वातावरण तयार याःगु प्रति लसता प्वंकादिसें आम हड्ताल लितकाःगु छवाः जुइधुंकूसां राजनीतिक दलत दथुइ सहमति मजूगु प्रति चिन्ता प्वंकादिल ।
माओवादी अध्यक्ष प्रचण्डं राजनीतिक दलत दथुइ सहमति कायम जुयाः याकनं हे शान्ति प्रकृया क्वचायेकेगु आश्वासन बियादिल । अथेहे वय्कलं माओवादी प्यलाया दुने सेना समायोजन यानाः शान्ति प्रक्रिया क्वचायेकत तयार जूगु खँ धयादिल ।
उगु इलय् ल्यानग्रेनं राष्ट्रसंघया सुरक्षा परिषद्या नेपाःया बारे जूगु सहलहया बारे प्रचण्डयात जानकारी बियादीगु खः ।
