सेना समायोजन विशेष समितिया म्याद प्यला तनेगु निर्णय

माओवादी लडाकु समायोजनबारे सहलह यायेत च्वंगु सेना समायोजन विशेष समितिया मुँज्यां सेना समायोजन प्राविधिक समितिया म्याद प्यला तनेगु निर्णय याःगु दु । प्रधानमन्त्री नापं मन्त्रिपरिसद्या ज्याकू सिंहदरवारय् थौं च्वंगु मुँज्याय् माओवादी प्रतिनििधं धाःसा ब्वति मकाः । समिति दुजः डाक्टर रामशरण महतं माओवादी प्रतिनिधिं ब्वति मकागु हुनिं समायोजनबारे मेगु सहलह न्ह्याये मफूगु धयादिल । सरकारं तयार याःगु प्यलाया कार्ययोजना कथं ज्या न्ह्याकेत प्राविधिक समितिया म्याद तंगु खः । थ्वहे दथुइ राष्ट्रसंघीय राजनीतिक मिसन अनमिनया म्याद सुरक्षा परिषदं प्यला तनेवं म्हिगः नेपाः थ्यंकाझाम्ह अनमीन प्रमुख करिन लनग्रेनं थौं सुथय् माओवादी नायः पुष्पकमल दाहालयात नापलानादीगु दु । नापलायेगु झ्वलय् प्यलाया दुने लडाकु समायोजन यायेगु माओवादी योजनाबारे सहलह जूगु धाःगु दु ।