सेना समायोजन प्रविधिक समितिया म्याद थप

सेना समायोजन विशेष समितिया बैठकं थःगु समिति अन्तर्गतया प्राविधिक समितिया म्याद प्यला थप याःगु दु । माओवादी लडाकुया रेखदेख, समायोजन व पुनःस्थापना सम्बन्धी विषेश समितिया शुक्रवाः च्वंगु बैठकं प्राविधिक समितिया म्याद थप यायेगु निर्णय याःगु खः ।

विशेष समितियात ग्वाहालि यायेगु निंतिं विशेषज्ञत दुथ्याकाः गठन याःगु प्राविधिक समितिया म्याद बिहीवाः क्वचाःगु खः । समितिया बैठकं म्याद थप यायेगु निर्णययात मन्त्रिपरिषद्या बैठकं अनुमोदन यायेधुंकाः लागु जुइ ।

प्रधानमन्त्री माधवकुमार नेपालया अध्यक्षताय् थौं च्वंगु बैठक माओवादीं बहिष्कार याःगु दु । माओवादीं सेना समायोजन लगायत गतिरोधया अन्त्य मजुइकं बैठकय् ब्वति कायेगुया छुं अर्थ मदुगु धासें बहिष्कार याःगु खः ।