म्याद थपं जनजातित सशंकित
येँ (सन्ध्या टाइम्स)/देय्न्यंकं वसोवास यानाच्वंपिं आदिवासी जनजातिया हक अधिकारया नितिं आदिवासी जनजाति महासंघया नायः राजकुमार लेखीं माल धाःसा विद्रोह यायेत नं थःपिं तयार दु धयादीगु दु ।
थौं सुथय् आदिवासी जनजाति पत्रकार संघं पोखराय् याःगु पत्रकार सम्मेलनय् न्ववासें जनजाति नेता लेखीं धयादिल 'न्हूगु संविधानय् आदिवासी जनजातिया हक अधिकार दुमथ्याकल धाःसा जिपिं विद्रोह यायेत तयार दु।' वय्कलं लिपांगु इलय् वयाः हथासं न्हूगु संविधान दयेकाः आदिवासी जनजातिया समस्या समाधान मयायेगु षडयन्त्र यानाच्वंगु दु धकाः नं धयादिल ।
अथे हे नेपाःया आदिवासी जनजातिया न्ह्यलुवात जातीय आधारय् स्वायत्त प्रदेश दयेकेगु धकाः संविधान सभाया राज्य पुनर्संरचना समितिं क्वःछिनातःगु निर्णययात उल्टे यायेगु षडयन्त्रय् लगे जुयाच्वन धइगु तायेकाः हथाय्चाया आन्तरिक सहलहय् ब्यस्त जुयाच्वंगु दु ।
थ्व हे दथुइ नेपाःया आदिवासी जनजातिय्गु थीथी खलः पुचःनिसें पार्टीत तकं दुथ्याकाः दयेकातःगु आदिवासी जनजाति वृहत् मोर्चा नेपालं आदिवासी जनजातित गुकथं न्ह्याः वनेगु धइगु खँय् थीथी खलः पुचःलिसे सहलह ब्याकाच्वंगु दु। उगु मोर्चाया नेतातय्सं जेष्ठया न्हापांगु वाः तकया दुने थःपिंसं संघर्षया ज्याझ्वः पित बीगु जुइ धकाः धाःगु दु ।
