जनजातिया धलखय् ८१ जाति
येँ (सन्ध्या टाइम्स)/नेपाःया आदिवासी जनजातिया धलखय् आः ८१ गू जातिया नां दुथ्याइगु जूगु दु। आदिवासी जनजाति सूची परिमार्जन कार्यदलं थुकिया सिफारिस याःगु खः। थनिं झिला न्ह्यः डा. ओम गुरुङ्गया अध्यक्षताय् दयेकूगु उगु कार्यदलया प्रतिवेदन थौं प्रधानमन्त्री माधवकुमार नेपालयात लःल्हाःगु खः ।
सरकारं न्हापा ५९ गू जातियात जक आदिवासी जनजातिया धलखय् तयातःगु खःसा आः उकी २२ गू न्हूगु जातियात नं दुथ्याकाः आदिवासी जनजातिया ल्याः ८१ दयेकूगु दु ।
कार्यदलं तयार याःगु उगु प्रतिवेदनय् लोपोन्मुख, सिमान्तकृत, अवसरं बन्चित व अवसरय् पहुँच मदुपिं धकाः आदिवासी जनजातितय्त प्यंगू ब्वय् ब्वथलातःगु दु। सम्बन्धित जातिया पूरा अध्ययन यानाः थ्व प्रतिवेदन तयार यानागु खँ संयोजक डा. गुरुङ्गं धयादीगु दु ।
