वाईसीएल भंग याये मते: डा. अरुण साय्मि

येँ (सन्ध्या टाइम्स)/स्वनिगःया बुद्धिजीवीतय् सुझाव कायेत म्हिगः माओवादीं सःतूगु ज्याझ्वलय् न्ववासें नेपाः राष्ट्रिय पार्टीया नायः डा. केशवमान शाक्यं नेपाःया सर्वहारा वर्ग व स्वनिगःया 'सुकिला मुकिला' वर्गया दथुइ फ्युजन यायेगु ज्या नेपाः राष्ट्रिय पार्टीं यायेमाः थें खने दया वल धयादीगु दु। माओवादीया सेना समायोजन बारे सरकारं धाःगु खँ पाय्छि मजू धासें थःपिंसं अय् जुयाः हे थःपिंसं सरकारयात बियागु समर्थन लित कयागु खः धकाः नं वय्कलं धयादिल ।

डा. अरुण साय्मिं वाईसीएल विघटन यायेमाःगु आवश्यकता मदु धासें येँया जनतां माओवादीयात समर्थन याना हे च्वंगु दु उकिं प्रचण्डं तंयात नियन्त्रण यायेमाल धयादिल ।

फुटबल खेलाडी गणेश थापां थः प्रचण्डया फ्यान खः धासें देश दयेकेगु खँय् पक्ष विपक्ष छुं हे मधासे न्ह्याः वनेमाः धयादिल। च्वमि खगेन्द्र संग्रौलां माओवादीं जनतायात समस्या जुल धकाः आमहडताल लित कायेधुंकाः आः सरकारं म्वाः मदुगु भाय् न्ववाना हयाच्वन धयादिल। हास्य कलाकार मदनकृष्ण श्रेष्ठं बैशाख २४ गते जूगु र्‍यालीं खुसि सिथय् हे थ्यनेधुंकूगु देशयात बचे याःगु दावी यानादिल। ज्याझ्वःया वय्कःया भाषण ताःहाकः जुल धकाः हुटिङ्ग नं याना हःगु खः। गायक रामेश श्रेष्ठं पार्टीइ दुने च्वंपिं बांमलाःपिं मनूतय्त वांछ्वयाः बांलाःपिंत जक ज्या याके बियादिसँ धयादिल। राजनीतिक विश्लेषक सीके लालं माओवादीं थौं थः कार्यकर्तायात बचे याः थें भविष्यय् नं बचे याना तयादिसँ, थ्व कार्यकर्ता मंत धाःसा बांलाःगु संविधान वइ धइगु ग्यारेन्टी दइ मखु धयादिल। नेवाः मिसा नेतृ डा. चुन्दा वज्राचार्यं फुक्कं पार्टी मिले जुयाः राष्ट्रिय सरकार दयेकेमाः धइगु नेवाःतय् माग खः, उकियात पूवंकेमाः धयादिल। पत्रकार ध्रुवहरि अधिकारीं प्रचण्डया धापू न्यनाः पत्रकार ग्यानाच्वंगु दु, कन्हय् माओवादीया सरकार वल धाःसा फरक बिचाः तइपिं पत्रकारतय्त छुं याइगु जकं मखुला धयादिल ।

ज्याझ्वलय् पद्मरत्न तुलाधर, दमननाथ ढुंगाना, कनकमणि दीक्षित, नेउवा संघया नायः कुशकुमार जोशी, कानूनविद् कृष्णप्रसाद भण्डारी, युवराज संग्रौला, पद्मज्योति, राजेन्द्र खेतान आदिपिंसं नं न्ववासें माओवादीयात थीथी सुझाव बियादीगु खः ।