उद्योगी व्यवसायीतय्सं सहमति यायेत निन्हुया अल्टिमेटम
उद्योगी व्यवसायीतय् मंकाः संगठन नेपाल उद्योग वाणिज्य महासंघं राजनीतिक दलतय्त पीच्याघौ दुने सहमति यायेत अल्टिमेटम ब्यूगु दु । पीच्याघौ दुने नं सहमति मजुसाः राजनीतिक दलतय्त दबाव बीगु निंतिं जनतायात सतकय् क्वकायेगु ख्याच्वः महासंघं ब्यूगु दु ।
बिहीवाः येँया वर्ल्ड ट्रेड सेन्टरय् च्वंगु उद्योगी व्यवसायीतय् आकस्मीक भेलां स्वंगू प्रमखु दल एनेकपा (माओवादी), नेपाली कांग्रेस व नेकपा (एमाले)यात देशय् खनेदुगु वर्तमान राजीनितक समस्या ज्यंकेत थुगु अल्टिमेटम ब्यूगु ख: ।
बैठकया निर्णय सार्वजनिक यानादिसें महासंघया अध्यक्ष कुशकुमार जोशीं शनिवाः तक सहमति मजुसाः दबाबमूलक ज्याझ्वः यायेगु कनदिल । वय्कलं शनिवाःया दुने स्वंगू दल सहमतिलय् वयेमाःगु थःपिनिगु चाहना जूगु कनादिसें उगु ई तक नं सहमति मजुसाः देय्न्यंक दबावमुलक शान्ति र्याली यायेगु धयादिल ।
शान्ति र्याली पाखें नं राजनीतिक सहमति मजुसाः व्यवसायीतय्सं राजनीतिक दलतय्त चन्दा मबीगु व सरकारयात कर मपुलेगु ख्याच्वः नं अध्यक्ष जोशीं बियादिल ।
बैठकय् राजनीतिक गतिरोध अन्त्यया निंतिं महासंघं म्हिताच्वंगु भुमिका व म्हितेमाःगु भुमिकाया बारे सहलह याःगु खः । बैठकय् देय्न्यंकया न्हय्न्यागूलिं जिल्लाया प्रतिनिधितय् ब्वति दुगु खः । बैठकय् न्ववापिं अधिकांश दुजःतय्सं प्रधानमन्त्री माधवकुमार नेपालं राजीनामा बियाः राजनीतिक गतिरोध ज्यंकेगु लँपु चायेकेमा:गु खँ धाःगु खःसा छुं छुं दुजतय्सं महासंघं राजनीतिक खँय् ल्हातय् मज्यूगु बिचाः प्वंकूगु खः ।
