'संविधानसभाया म्याद थप यायेत सहमति अनिवार्य'
संविधानसभाया म्याद क्वचायेत निवाः जक ल्यं दनीगु इलय् प्रधानमन्त्री माधवकुमार नेपालं ई थप यायेगु बारे राजनीतिक दलत नापया परामर्शय् तीव्रता बियादीगु दु । वय्कलं बिहीवाः राष्ट्रिय प्रजातन्त्र पार्टीया अध्यक्ष पशुपति शम्शेर जबरा व राष्ट्रिय जनशक्ति पार्टीया अध्यक्ष सूर्यबहादुर थापा नाप परामर्श यानादीगु खः ।
परामर्शय् राप्रपा व राजपाया नेतातय्सं संविधानसभाया म्याद थप यायेत राजनीतिक दलत दथुइ सहमति अनिवार्य जूगु सुझाव प्रधानमन्त्रीया ब्यूगु खः । उगु इलय् राजपाया अध्यक्ष थापां आःया परिस्थितिइ राजनीतिक दलत दथुइ सहमति अनिवार्य जूगु धयादिसें सहमति लिपा जक संविधानसभाया म्याद थप यायेगु सुझाव बियादीगु खः ।
राप्रपाया अध्यक्ष राणां माओवादी लडाकुया समायोजन व व्यवस्थापन, वाइसीएलया अर्ध सैन्य संरचना भंग व माओवादीं कब्जा यानातःगु छेँबुँ लितबीगु बल्लागु आधार सहितया मार्ग चित्र तयार यानाः संविधानसभाया म्याद थप यायेगु सुझाव बियादीगु खः ।
अथेहे प्रधानमन्त्री नेपालं सद्भावना पार्टी, नेपाली जनता दल, राप्रपा नेपाल, राष्ट्रिय जनमोर्चा व नेपाल परिवार दलया नेतात नाप नं बिहीवाः परामर्श यानादीगु दु । उगु इलय् राष्ट्रिय जनमोर्चाया अध्यक्ष चित्रबहादुर केसीं माओवादीं संविधान दयेके मब्यूगु कारणं हानं माओवादीं संविधान निर्माणय् ग्वाहालि याइगु सुनिश्तिता मदयेकं म्याद थप यायेया अर्थ मदइगु खँ धयादीगु खः ।
राप्रपा नेपालया अध्यक्ष कमल थापां संविधानया म्याद निलाःया निंतिं जक जूगुलिं आः संविधानसभाया म्याद तनेमज्यूगु धयादिसें न्हूगु जनादेश पाखे वनेगु निंतिं चुनावय् वनेमाःगु सुझाव बियादिल ।
सद्भावना पार्टीया अध्यक्ष राजेन्द्र महतो, नेपाली जनता दलया अध्यक्ष हरिश्चन्द्र साह व नेपाल परिवार दलया अध्यक्ष एकनाथ ढकालं राजनीतिक दलत दथुइ सहमति यायेधुंकाः जक संविधानसभाया ई थप यायेमाःगु सुझाव प्रधानमन्त्री नेपालयात ब्यूगु खः ।
