कोइरालाया थासय् भट्टराई सभासद्
नेपाली कांग्रेसया सभापति मदुम्ह गिरिजाप्रसाद कोइरालाया खाली जूगु सभासद् पादय् कांग्रेसया युवा नेता मनमोहन भट्टराईयात चयन या:गु दु ।
बिहीवाः कांग्रेस कार्यवहाक सभापति सुशील कोइरालाया महाराजगंजय् च्वंगु संसदीय बोर्डया बैठकं भट्टराईयात खाली पदया निंतिं चयन याःगु खः । खाली पदया निंतिं कांग्रेस कार्यवहाक सभापति कोइराला, वरिष्ठ नेता शेरबहादुर देउवा व संसदीय दलया नेता रामचन्द्र पौडेलं बिस्कं बिस्कं नां प्रस्ताव याःगु खःसां लिपा देउवां प्रस्ताव यानादीम्ह भट्टराईया नांमय् सर्वसम्मति जूगु खः ।
कार्यवहाक सभापति कोइरलां सुनील भण्डारी व पौडेलं रामचन्द्र पोखरेलया नां प्रस्ताव याःगु खः । कांग्रेसया केन्द्रीय समितिया बैठकं अनुमोदन यायेवं पार्टीं औपचारिक रुपं भट्टराईया नां निर्वाचन आयोगय् छ्वइगु ज्याझ्वः दु ।
समानुपातिक निर्वाचन प्रणाली मार्फत सभासद् जुयादीम्ह कोइराला वंगु चैत ७ गते मदेवं कांग्रेसया छगू सभासद् पद खाली जूगु खः ।
