अनिश्चितकालीन हड्ताल यायेगु ज्या गल्ती : प्रचण्ड़

थःम्हं येँया जनताया न्ह्यावलें सम्मान यानागु

एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' अनिश्चितकालीन हड्ताल यायोगु ज्या गल्ती जूगु खँ धयादीगु दु । वय्कलं निश्चित मिति क्वःमछिसें अनिश्चितकाल धाःगुलिं गल्ती जूगु धयादिसें थ्व बारे महसूस यानाः पार्टीं हड्ताल लितकायेगु निर्णय याःगु कनादिल ।

माओवादीं बुधवा: येँया होटल याक एन्ड यतिलय् उद्योगी व्यवसायी, बुद्धिजीवी लगायत नागरिक समाजया थीथी मनूतनाप या:गु अन्तर्क्रियाय् वय्कलं खुल्लामञ्चय् थःम्हं भचा आवेगय् वयाः न्ववाःगु प्रति क्षमा फ्वनादिसें सुकिलामुकिला धकाः थःम्हं छगू प्रतिशत बुद्धिजीवीतय्त जक धयाःगु स्पष्ट यानादिल । वय्कलं प्रचण्डयात फाँसी ब्यू धकाः धयाजूगुलिं खुल्लामञ्चय् थः आवेगय् वयाःगु धयादिसें ९९ प्रतिशत बुद्धिजीवीत जनताया पक्षय् दुगु धयादिल ।

येँया जनता भेदभाव विरुद्ध कुहांवइगु दावी यानादिसें प्रचण्डं येँया जनता न्ह्यावलें नं जनता व समानताया परिवर्तनया पक्षय् दनीगु धयादिल । वय्कलं थःगु उदेश्य येँया जनतया नुगः स्याकेगु जुइमफइगु धयादिसें थःम्हं येँया जनताया न्ह्यावलें सम्मान यानागु धयादिल ।

संविधानसभाया चुनावय् ब्वति कायेधुंकाः थःपिं प्रजातान्त्रिक शक्ति जूगु धयादिसें प्रचण्डं निर्वाचन लिपा सरकारया नेतृत्व याःगु इलय् नागरिक पार्टी जुइगुसा: आः नागरिक पार्टी जुइमाःगु धकाः छाय् पंग थनाच्वंगु धका: न्ह्यसः तयादिल । वय्कलं विस्तृत शान्ति सम्झौता जुयाः ल्वाभः क्यान्टोन्मेन्टय् तःगु इलय् हे माओवादी नागरिक पार्टी जुइधुंकूगु स्पष्ट यानादिल ।

वय्कलं राष्ट्रिय सहमति जुइसा: माओवादी जेठ दुने लडाकु समायोजन व पुनःस्थापना यायेत तयार जूगु धयादिसें प्यलाःया दुने शान्ति प्रकृयायात पूवंकेत नं थःपिं तयार जूगु धयादिल । तर आः हे समायोजन यायेगु लडाकुया ल्या क्वःछिमाःगु शर्त न्ह्यने हयाच्वगु प्रति आपत्ति प्वंकादिसें थ्व माओवादीयात 'ह्युमिलेट' यायेत रिमोट पाखें वःगु खँ जूगु दावी यानादिल ।

अथेहे थःपिं वाइसीएलया अर्ध सैनिक संरचना चीकेत नं तयार जूगु धयादिसें वय्कलं बेपत्ता जूपिंत मालेगु निंतिं शक्तिशाली आयोग दयेकाः बेपत्ता जूपिनि पहिचान यायेफइगु धयादिल । वय्कलं थःपिं शान्ति व पुनर्मिलन आयोग गठन यायेत नं तयार जूगु धयादिल ।

आःया अवस्था अग्रगमन चाहे जूपिं व प्रतिगमन चाहे जूपिं दथुइया ल्वापु जूगु धयादिसें पराधीनताया पक्षधर व स्वाधिनताया पक्षधरतय् ल्वापु नं जूगु वय्कलं धयादिल । प्रचण्डयात प्रधानमन्त्री दयेकेत आन्दोलन जूगु धकाः दुस्प्रचार जूगु धयादिसें शान्ति व गणतन्त्र खतराय् दुगुलिं आन्दोलन यायेमाःगु धयादिल ।

सहमित लिपा सुया नेतृत्वय् सराकार गठन यायेगु व प्रधानमन्त्रीया विकल्प खुल्ला दुगु धयादिसें प्रचण्डं दक्वस्यां छप्वाः म्हूतुं माधव नेपालया राजीनमा फ्वंसाः झीसं थःगु हे कुतःलं समस्या समाधान यायेफइगु मखुसाः माधव नेपालया राजीनामा तत्काल सम्भव मजूगु धयादिल ।

अन्तर्क्रिया ज्याझ्वलय् उद्योगी व्यवसायी, बुद्धिजीवी लगायत नागरिक समाजया थीथी मनूतय्सं छु धाल सिकादीत थन क्लिक यानादिसं ।