अन्तर्क्रियाय् सुनां छु धाल ?
एकीकृत नेकपा (माओवादीं) बुधवा: येँया होटल याक एन्ड यतिलय् उद्योगी व्यवसायी, बुद्धिजीवी लगायत नागरिक समाजया थीथी मनूतनाप अन्तर्क्रिया ज्याझ्व: या:गु दु । उगु ज्याझ्वलय् सुनां छु धाल छक्वये स्वये :-
डा. बाबुराम भट्टराई, उपाध्यक्ष एनेकपा माओवादी
थःपिनिगु आन्दोलनयात कमजोरी कथं मकायेत ख्याच्वः बियादिसें थुकीयात माओवादीया कमजोरी कथं काःसा युद्धयात सुनां पनेमफइगु धयादिल । वय्कलं राष्ट्रिय सहमतिया निंतिं सुयातं निषेध मयासें न्ह्याः वनेमाःगु धयादिल ।
पद्मरत्न तुलाधर, मानवअधिकारवादी नेता
विदेशीतय्सं झीगु आन्तरिक मामिलाय् हस्तक्षेप यानाच्वंगु खःसा उकीयात परास्त यायेमाःगु धयादिसें विद्यमान समस्या समाधान यायेत थःपिं मध्यस्थता यायेत तयार जूगु धयादिल ।
दमननाथ ढुङ्गाना, पुलाम्ह सभामुख
माओवादीयात संविधानसभा पाखें संविधान जारी यायेगु पाखे इमान्दार जुया लगेजुइत इनाप यानादिसें संविधान बचे यायेत माओवादीयात इनाप यानादिल । माओवादीं सतकय् कार्यकर्तातय्त हयाः प्रधानमन्त्रीया राजीनामा फ्वंगु खँयात कुखिंनादिल ।
कुशकुमार जोशी, अध्यक्ष, नेपाल उद्योग वाणिज्य महासंघ
माओवादीं आम हड्ताल लितकाःगु खँय् सुभाय् बियादिल । थःपिं नं चप्पल न्ह्याना: जूपिंत सुकिला मुकिला जूगु स्वये चाहे जुयाः शान्तिभेला याना:गु धयादिसें भिजिलान्ते सु खः थःपिंसं मस्यूगु धयादिल ।
प्रेम बहादुर खड्का, अध्यक्ष, नेपाल बार एसोसिएसन
माओवादी तःधंगु दल जूगुलिं अप्व जिम्मेवार जुइमाःगु धयादिल । संविधान दुने छु विषलय् सहमति जूगु व छु विषलय् असहमति जूगु स्पष्ट यायेमाःगु धयादिसें जेठ १४ दुने असहमतिया विन्दुयात सहमतिलय् थ्यंकाः संविधानसभाया ई थप यायेमाःगु धयादिल ।
सुन्दरमणि दीक्षित, नागरिक समाज
माओवादीं थःगु एजेण्डा त्वःता बिस्यूंवने मज्यूगु धयादिसें प्रधानमन्त्री माधवकुमार नेपालं राजीनामा बियाः राष्ट्रिय सहमतिया निंतिं लँपु चायेकेमाःगु धयादिल
डा. केशवमान शाक्य, अध्यक्ष, नेपाः राष्ट्रिय पार्टी
सर्वदलीय सिद्धान्तया आधारय् दकलय् तःधंगु दलं प्रम जुइ दइगु व शान्ति प्रकृयाया सिद्धान्तय् विद्रोही पक्ष प्रधानमन्त्री जुइदइगु धयादिसें प्रधानमन्त्रीया कुर्सी अन्तर्राष्ट्रिय सिद्धान्तया आधारय् माओवादीया हक दुगु धयादिल । वय्कलं दक्वं प्रमाणिकरण जुइधुंकूपिं लडाकुत सेनाय् समायोजनया दावेदार जूगु धयादिल ।
रेणु राजभण्डारी, मिसा अधिकारकर्मी
म्वाःगु संविधान जारी यायेत माओवादी जिम्मेवार जुइमा:गु धयादिसें सिनाच्वंगु संविधान जारी जूसाः थःपिंत मान्य मजुइगु धयादिल । आम हड्ताल लितकयाः माओवादी बूगु मखसें त्याःगु दावी यानादिल ।
चुन्द बज्राचार्य, मानवशास्त्री
प्रधानमन्त्रीं राजीनामा बियाः सहज परिस्थिति निर्माण यायेमाःगु धयादिसें सर्वपक्षिय सरकार निर्माण यायेमाःगु खँय् बः बियादिल । वय्कलं नेवा:त धर्मनिरपेक्ष राज्यया पक्षय् दुगु कनादिल । वय्कलं बन्द लितकाःगुलिं माओवादीयात सुभाय् बियादिल ।
डा. अरुण सयामी, डाक्टर
प्रचण्डं आक्रोशित जुयाः येँया जनतायात तँ प्वंकादीगु प्रति असहमति प्वंकादिसें येँया जनता न्ह्यावलें छिकपिं नापं दुगु धयादिल । वय्कलं माधव नेपालं राजीनाम बीमाःगु धयादिसें राजीनमा मब्यूसाः ज्ञानेन्द्र पाखें पाठ स्यनाः कायेमाःगु धयादिल ।
मदनकृष्ण श्रेष्ठ, कलाकार
न्यागू तारे होटलय् दुपिं दक्वं सुकिलामुकिला, भिजिलान्ते, राष्ट्रवादी, देशद्रोशीयात अभिवादन यानादिसें देय् दुर्घटनाय् वनेत्यंगुलिं आः गवलें नं अनिश्चितकालीन आम हड्ताल मयायेत इनाप यानादिल । नापं वय्कलं विधि सम्मत ढंगं न्ह्याः वनेत इनाप यानादिल ।
खगेन्द्र संग्रौला, च्वमि
माओवादीया आन्दोलन लित व प्रधानमन्त्रीया राजीनामा नापं वयेमाःगु इच्छा यक्वसियां न्हापानिसें या:गु व आः नं अथेहे चाहे जूगु धयादिल । वय्कलं संविधान जारी जुइ न्ह्यः सेना समायोजन जुइमाःगु धयादिस निगू सेनाया उपस्थिति द्वन्द्वया परिचायक जूगु धयादिल ।
अन्तर्क्रिया ज्याझ्वलय् अधिवक्ता रामनारायण विडारी, बारबरा एडम्स, सिकेलाल, गणेश थापा, पत्रकारिपं ध्रुवहरि अधिकारी व विजय पौडेल नापं गायक रामेशं नं थःथःगु बिचाः प्वंकादीगु खः ।
