सरकारया सर्तया बारे कांग्रेस-एमाले सहलह
सत्तारुढ नेपाली कांग्रेस व नेकपा (एमाले) दथुइ राजनीतिक समस्या समाधान यायेत माओवादी नाप गुकथं खँल्हाबंला यायेगु धइगु बारे सहलह जूगु दु । कांग्रेस मू ज्याकू सानेपाय् बुधवाः जूगु निगू दल दथुइया सहलहलय् माओवादीं शान्ति सम्झौता सहित पुलांगु सम्झौता कार्यान्वन याःसा न्हूगु राष्ट्रिय सहमति सरकार गठन यायेफइगु बारे सहलह जूगु दु ।
अथेहे बैठकय् निगू दल दथुइ संविधान संशोधनया विषयलय् नं सहलह जूगु दु । उगु इलय् संविधानसभाया म्याद थप यायेत माओवादी नाप सहलह यानाः संशोधन यायेगु निर्णय याःगु दु । अथेहे स्वंगूलिं दलया शीर्ष नेतात च्वनाः द्विपक्षीय व त्रिपक्षीय सहलहयात तीव्रता बीगु खँ क्वःछिउगु दु ।
कांग्रेस नेता अर्जुननरिसंह केसीं देय् दुर्घटना लायेत्यंगु व जटिल अवस्थाय् दुगुलिं उखें बचे यायेत दक्वसिनं त्याइगु व दक्व पक्षया सम्मान जुइकथं समाधान मालेमाःगु धयादिल ।
खँल्हाबंलाय् कांग्रेस कार्यवहाक सभापति सुशील कोइराला, वरिष्ठ नेता शेरबहादुर देउवा, संसदीय दलया नेता रामचन्द्र पौडेल, महामन्त्री विमलेन्द्र निधि लगायत नेतातय् उपस्थिति दुगु खःसा एमाले पाखें अध्यक्ष झलनाथ खनाल, महसचिव इश्वर पोखरेल, सचिव विष्णु पौडेल, स्थायी समिति नेता भरतमोहन अधिकारी लगायतया नेतातय् उपस्थिति दुगु खः ।
