गणतन्त्र दिवसया लसताय् थीथी ज्याझ्वः याइगु
सरकारं थुगुसीया गणतन्त्र दिवस भव्यरुपं न्यायेकेत थीथी ज्याझ्वः यायेगु निर्णय याःगु दु । बुधवाः प्रधानमन्त्री माधवकुमार नेपालया अध्यक्षताय् राष्ट्रिय योजना आयोगया सभाकक्षय् च्वंगु बैठकं जेठ १४, १५ व १६ गते स्वंन्हुन्यंक गणतन्त्रया महत्वं जाःगु ज्याझ्वःत नेपाः व विदेशय् च्वंगु नेपाःया दूतावास, नियोग व वाणिज्य दूतावासय् न्यायेकीगु निर्णय याःगु दु । उकीया निंतिं प्रधानमन्त्री माधवकुमार नेपालया अध्यक्षताय् ९९९ दुजः दुगु गणतन्त्र दिवस मूल समारोह समिति, २०६७ गठन याःगु दु ।
बैठकं जेठ १४ गते राष्ट्रियस्तरय् पत्रपत्रिकाय् गणतन्त्र विशेषांक प्रकाशित ययोगु, रेडियो नेपाल, नेपाल टेलिभिजन लगायत सरकारी व निजी संचार माध्यमय् गणतन्त्रया महत्व बारे ज्याझ्वः संचालन यायेगु व सनिलय् देय्न्यंक दीपावली यायेगु निर्णय याःगु दु ।
१५ गते सुथसिया झिताः इलय् गणतन्त्र दिवसया मू ज्याझ्वः येँया तिंख्यलय् यायेगु व उकीयात रेडियो नेपाल व नेपाल टेलिभिजन पाखें प्रत्यक्ष प्रसारण यायेगु नापं उगु ज्याझ्वल्य् समाजया विशिष्ट व्यत्तित्वतय्त ब्वनेगु निर्णय याःगु दु ।
अथेहे जेठ १६ गते सिरपा व दसीपौ लःल्हायेगु व सनिलय् दीपावली यायेगु ज्याझ्वः क्वःछिउगु दु । विदेश स्थित नेपाली दूतावस, नियोग व वाणिज्य दूतावासय् नं स्वन्हु तक गणतन्त्र दिवसया लसतालय् भव्य ज्याझ्वः यानाः न्यायेकीगु व दीपावली याइगु जूगु दु ।
ज्याझ्वःयात भव्यरुपं सफल यायेत प्रचार प्रसार उपसमिति, मञ्ज सजावट व व्यवस्थापन उपसमिति, ग्राउण्ड व्यवस्थापन व कवाज, व्यायाम समन्वय उपसमिति, परिसम्वाद सम्वार्ता उपसमिति व मूल्यांकन उपसमिति यानाः न्हय्गू उपसमिति गठन याःगु दु ।
