प्रधानमन्त्री पाखें स्वंगू वाम दलनाप परामर्श
प्रधानमन्त्री माधवकुमार नेपालं थौं नं राजनीतिक परामर्शयात निरन्तरता बियादीगु दु । संविधानसभा ई झिखुन्हु जक ल्यं दनीगु इलय् उकीया ई थप यायेगु बारे परामर्श न्ह्याकादीगु खः ।
प्रधानमन्त्री नेपालं बुधवाः नेकपा (माले), नेपाल मजदुर किसान पार्टी व नेकपा (संयुक्त)या नेतात नाप संविधानसभाया ई थप यायेगु बारे सहलह यानादीगु खः । उगु इलय् स्वंगू दलया नेतातय्सं संविधानसभाया ई झिंखुन्हु लिपा फुइगु व वयां लिपा संवैधानिक रिक्तता जुइगुलिं अज्याःगु अवस्था वये मबीत माओवादी सहित दलनाप सहलह यानाः संविधानसभाया ई थप यायेत इनाप याःगु खः ।
अथेहे प्रधानमन्त्री नेपालं नेपाः राष्ट्रिय पार्टी, राष्ट्रिय जनमोर्चा, समाजवादी प्रजातान्त्रिक जनता पार्टी, नेपाल लोकतान्त्रिक समाजवादी दल, चुरे भावर एकता पार्टी व दलित जनजाति पार्टीया नेतात नाप नं बिस्कं बिस्कं परामर्श यानादीगु दु ।
