संविधानसभाया ई थप यायेगु बारे याकनं हे विधेयक पेश जुइगु
प्रधानमन्त्री माधवकुमार नेपालं थःम्हं याकनं हे संविधानसभाया ई थप यायेगु बारे विधेयक व्यवस्थापिका संसदय् यंकेगु जानकारी राष्ट्रपति डा. रामवरण यादवयात बियादीगु दु । मंगलवाः राष्ट्रपति भवन शितल निवासय् राष्ट्रपति व प्रधानमन्त्री दथुइ जूगु खँल्हाबंलाय् प्रधानमन्त्री नेपालं थ्व खँ धयादीगु खः ।
प्रधानमन्त्री माधवकुमार नेपालं जेठ १४ गते संविधान निमार्ण यायेगु अवस्था मदुगुलिं संविधानसभाया ई थप यायेमाःगु धयादिल । वय्कलं जनतां संविधान दयेकेगु निंतिं हे संविधानसभाया निर्वाचनय् ब्वति काःगु धयादिसें संविधानसभा पाखें हे संविधान निर्माण यायेमाःगु खँय् बः बियादिल । वयक्लं थुकीया निंतिं थःम्हं थीथी दलनाप परामर्श न्ह्याकाःगु धयादिल ।
उगु इलय् राष्ट्रपति यादवं थः नं संविधानसभा पाखें हे संविधान निर्माण जुइमाः धइगु पक्षय् दुगु धयादिसें थुकीया निंतिं दलत दथुइ सहमति जुइगु विश्वास प्वंकादिल ।
