आम हड्तालय् दमन मजूगु गृहमन्त्रीया धापू
गृहमन्त्री भीम रावलं प्रमखु प्रतिपक्षी दल एनेकपा (माओवादीं) याःगु आम हड्तालया ज्याझ्वलय् सरकारी पक्षं छुं नं कथंया दमन मजूगु स्पष्ट यानादीगु दु ।
मंगलवाःया व्यवस्थापिका संसदया बैठकय् न्ववानादिसें वय्कलं सुरक्षाकर्मीतय्सं उत्तजेना ब्वलंकेगु ज्या मयाःगु धयादिसें आम हड्तालया इलय् प्रहरीं क्यंगु संयमताया प्रशंसा यानादिल । वय्कलं राष्ट्रिय अनुसन्धान आयोगया कर्मचारीतय्सं ल्वाभः ज्वना वःगु धकाः माओवादीं मखूगु द्वपं ब्यूगु धयादिसें उपिं अन ड्युटी यानाच्वंगु धयादिल ।
बैठकय् नेपाली कांग्रेस संसदीय दलया नेता रामचन्द्र पौडेलं माओवादीं याःगु आम हड्तालया कारणं उकुस मुकुस जूगु जनता स्वतः स्फुर्त रुपं सतकय् कुहांवःगु दावी यानादिसें छुं नं राजनीतिक दलं थःपिनिगु भातृ संगठनयात प्रतिकार यायेत निर्देशन मब्यूगु धयादिल । वय्कलं माओवादीया लडाकुया समायोजन व व्यवस्थापन, वाइसीएलया अर्धसैन्य संरचना भंग व माओवादीं कब्जा यानातःगु छेँबुँ लितबीगु ज्या जुइधुंका: जक माओवादी नेतृत्वया सरकार सम्भव जूगु धयादिल ।
अथेहे माओवादी सभासद् वर्षमान पुन 'अनन्तं' सरकारं ल्वाभः इनाः माओवादीया आम हड्तालयात हिंसात्मक दयेकाः देशय् गृहयुद्ध ब्वलंकेत स्वःगु द्वपं बियादिल । वय्कलं एमाले सम्बद्ध युवा संगठनया अध्यक्ष महेश बस्नेतया नेतृत्वय् ख्वपःय् गोली चलेजूगु दावी यानादिल ।
एमाले सभासद् प्रदीप ज्ञवालीं एमाले अहिंसाय् विश्वास याइगु दल जूगुलिं युवा संघंया कार्यकर्तातय्सं ख्वपय् गोली चले याःगु खँयात अस्वीकार यानादिल । वय्कलं माओवादी आन्दोलनं दिक्क जुयाः जनता बसन्तुली कुहांवःगु दावी यानादिल ।
