गौतमयात आत्मालोचना यायेत निर्देशन
नेकपा (एमाले)या स्थायी कमिटीया बैठकं पार्टी उपाध्यक्ष वामदेव गौतमयात प्रधानमन्त्रीया राजीनामा फ्वंगु विषयलय् गल्ती महशुस यानाः आन्मालोचना यायेत निर्देशन ब्यूगु दु ।
मंगलवाः पार्टी मू ज्याकू मदननगर बल्खुइ अध्यक्ष झलनाथ खनालया अध्यक्षता च्वंगु बैठकं उपाध्यक्ष गौतमं पार्टी नीति, निर्णय, हित व पद्धति वितरित प्रधानमन्त्रीया राजीनामा माग यासें इमेल पाखें ज्ञापनपौ छ्वःगु ठहर याःगु दु । नापं गौतमयात आवनिसें पार्टीया नीति, निर्णय व पद्धतियात दृढतापूर्वक अनुशरण व परिपालना यायेत निर्देशन ब्यूगु दु ।
पार्टीया केन्द्रीय अनुशासन आयोगं थुकीया बारे ज्या शुरु यायेधुंकूगुलिं केन्द्रीय अनुशासन आयोगया सिफारिस लिपा पार्टी केन्द्रीय कमिटीं अनुशासनात्मक कार्वाहीया सम्बन्धय् आवश्यक निर्णय कायेगु खँ क्वःछिउगु दु ।
अथेहे बैठकय् देय्या वर्तमान राजनीतिक परिस्थितिया बारे नं सहलह जूगु दु । वर्तमान अवस्था तसकं जटिल जूगुलिं राष्ट्रिय सहमतिलय् वनेगु बाहेक मेगू विकल्प मदुगु निर्णय बैठकं याःगु दु । उकीया निंतिं प्रमुख राजनीतिक दलत दथुइया वार्तायात तीव्रता बीगु व सहमतिया निंतिं मंकाः निष्कर्षय् थ्यंकेगु निर्णय याःगु दु ।
एमालें देय्या समसामयिक राजनीतिक परिस्थितिया बारेय् आवश्यक निर्णय यायेत वइगु जेठ १ व २ गते केन्द्रीय कमिटीया बैठक च्वनेगु निर्णय याःगु दु ।
