संविधानसभाया ई थप यायेगु ज्या असंवैधानिक : थापा़
राष्ट्रिय प्रजातन्त्र पार्टी नेपालया अध्यक्ष कमल थापां संविधानसभाया ई थप यायेगु ज्या जुसाः असंवैधानिक जुइगु खँ धयादीगु दु । वय्कलं आः जेठ १४य् संविधान जारी जुइमफइगु व जनादेश विपरीत संविधानसभाया म्याद थप यायेमज्यूगुलिं उकीया निंतिं न्हूगु जनादेशय् वनेगुया विकल्प मदुगु धयादिल ।
भारतय् शिव सेनाया ग्वसालय् जूगु हिन्दू सम्मेलनय् ब्वति कयाः मंगलवाः येँय् लिहांझायादीम्ह थापां त्रिभुवन विमानस्थलय् पत्रकारत नाप खँल्हाबंला यानादिसें संवैधानिक शून्यता पाखें बचे यायेत राजसंस्थाया आवश्कता जूगु धयादिल । वय्कलं राजनीतिक दलत दथुइ वैचारिक द्वन्द्वया कारणं देशय् संवैधानिक संकट जुइत्यंगु द्वपं नं बियादिल ।
थापां नेपाःयात हानं हिन्दू राष्ट्र स्थापित यायेत योजनाबद्ध रुपं अभियान न्ह्याकेगु धयादिसें भारतीय नेतात थुकीया निंतिं न्ह्यागु नं कथं ग्वाहालि यायेत तयार दुगु दावी कनादिल ।
