आदिवासी जनजाति हथाय्चाल

येँ (सन्ध्या टाइम्स)/न्हूगु संविधान जारी यायेगु ई गुलि गुलि म्हो जुयावन उलि उलि हे आदिवासी जनजातित हथाय् चायाहःगु दु। संविधानसभाया राज्य पुनर्संरचना नापं राज्य शक्ति बाँडफाँड समितिं तयार याःगु जातीय व क्षेत्रीय आधारय् स्वायत्तताया अधिकार दुगु राज्य पुनर्संरचनाया प्रस्तावयात आः दलतय्सं वाय्त्यः फ्वाय्त्यः यानाः संविधानसभाया म्याद थप यासें थःपिनि हक अधिकारयात मबीगु षडयन्त्र शुरु जुल धकाः तायेकाः आदिवासी जनजातिया न्ह्यलुवात सक्रिय जुयावःगु खः ।

मू मू राजनीतिक पार्टी एकीकृत माओवादी, नेपाली कांग्रेस व एमालेया नेतातय् दथुइ खुगू बुँदाय् सहलह जुया इमि दथुइ सहमति जुल धाःसा मेगु खँ सिबें जातीय आधारय् स्वायत्तता बीगु अर्थात राज्य पुनर्संरचना यायेगु प्रस्तावयात त्वःताः राज्य पुनर्संरचना आयोगयात प्राथमिकता बिया वन धाःसा आदिवासी जनजातित हे द्यापं च्वने मालीगु तायेकाः अथे नेतात हथाय् चायावःगु खः ।

थ्वहे झ्वलय् नेपाल आदिवासी जनजाति महासंघं थौं हे आदिवासी जनजातितय्गु थीथी मोर्चातलिसे सहलह ब्याकीगु जूगु दु। अथे हे आः याकनं हे थःपिनिगु हक अधिकार सुनिश्चित यायेगु निंतिं आन्दोलन याना दवाव बीगु बाहेक मेगु छुं नं लँपु मदयेधुंकल धकाः आदिवासी जनजातिया न्ह्यलुवातय्सं धयाहःगु दु। आदिवासी जनजातिया न्ह्यलुवा डा. कृष्णबहादुर भट्टचनं आः जेष्ठ १० गते न्ह्यः हे आन्दोलनया उच्च तहलय् थ्यंकेगु कथंया आन्दोलन आदिवासी जनजाति नापं मधेशीत जानाः यायेमाः धकाः धयादीगु दु ।