ओखलढुंगाय् माओवादीया नाकाबन्दी
येँ (सन्ध्या टाइम्स)/थःपिनि कार्यकर्तायात दाःगु विरोधय् माओवादीं ओखलढुंगाया सदरमुकामय् अनिश्चितकालीन नाकाबन्दी तया बिउगु दु ।
वंगु २३ गते थः कार्यकर्तायात दाःपिं मनूतय्त कारवाही मजूतले नाकाबन्दी यायेगु धकाः घोषणा याःगु खः ।
माओवादीया कार्यकर्तात अनया केतुके, रुम्जाटार, रामपुर लगायतया थीथी नाकाय् च्वनाः सवारी साधनयात पनाच्वंगु दु। माओवादीया कार्यकर्तातय्सं थाय्थासय् सिमा तकं पालाः लँय् पंगः थना बिउगुलिं यातायात ठप्प हे जुयाः नाकाबन्दी जुयाच्वंगु दु ।
सवारी साधन चले मजुइवं अनया जनजीवन झन झन कष्टकर जुजुं वनाच्वंगु दु। प्रमुख जिल्ला अधिकारी फणिन्द्रमणि पोखरेलं समस्या समाधानया निंतिं नागरिक समाज, थीथी पेशाकर्मी व राजनीतिक दलया प्रतिनिधितलिसे सहलह ब्याकेगु यानाच्वंगु दु ।
