संविधानसभाया ई थप यायेगु बारे प्रम पाखें परामर्श
प्रधानमन्त्री माधवकुमार नेपालं संविधानसभाया ई थप यायेगु बारे परामर्श शुरु यानादीगु दु ।
वय्कलं मंगलवाः सुथय् नेपाल सद्भावना पार्टी (आनन्दीदेवी)या अध्यक्ष श्यामसुन्दर गुप्ता नाप उकीया बारे परामर्श यानादीगु खः । गुप्तां दलत दथुइ लोकतान्त्रिक मूल्य व संवैधानिक मान्यता कथं सहमति निर्माण यायेमाःगु व संविधानसभा पाखें हे संविधान निर्माण यायेमाःगु खँय् बः बियादीगु खः ।
जेठ १४य् संविधानसभाया समयावधी क्वचाये न्ह्यः संसदय् अन्तरिम संविधान संशोधनया प्रस्ताव यंकेगु तयारीलय् सरकार दुगुलिं प्रधानमन्त्रीं दलत नाप थुकीया बारे परामर्श न्ह्याकूगु खँ प्रधानमन्त्रीया प्रेस सल्लाहकार विष्णु रिजालं कनादिल ।
संविधानसभा पाखें निर्धारित इलय् संविधान जारी यायेगु सम्भावना मदेवं प्रधानमन्त्रीं थ्व परामर्श न्ह्याकादीगु खः । संविधानसभा पाखें निर्धारित इलय् संविधान जारी यायेत आः झिंखुन्हु जक ल्यं दनी ।
