झिगू दलं सरकारया राजीनामा फ्वनः
संविधानसभाय् दुथ्याःगु दकलय् तःधंगु दल एकनेपा (माओवादी) सहित झिगू दलं सरकारया राजीनामा फ्वंगु दु । वर्तमान सरकार शान्ति व संविधान निर्माण यायेगु ज्याय् पूर्ण रुपं असफल जूगु धासें सहमतिया आधारय् राष्ट्रिय मंकाः सरकार निर्माण यायेगु पूर्वाधार तयार यायेत वर्तमान सरकारयात तत्काल राजीनामा बीत माग याःगु दु ।
सोमवाः माओवादीया मू ज्याकू पेरिस डाँडाय् च्वंगु भिगू दलया बैठकं जेठ १४ गते तक संविधानसभा पाखें न्हूगु संविधान जारी यायेगु व शान्ति प्रकृयायात सफलतापूर्वक सम्पन्न यायेगु थौंया दकतय् महत्वपूर्ण कार्यभारया निंतिं माधवकुमार नेपाल नेतृत्वया वर्तमान सरकार पूर्णरुपं असफल जूगु ठहर याःगु दु ।
बैठक लिपा भिगू दलं मंकाः रुपं पिथंगु प्रेस विज्ञप्तिइ राष्ट्रिय स्वाधीनता, संघीयता, गणतन्त्र, धर्म निरपेक्षता, लोकतन्त्र, सामाजिक न्याय, शान्ति व संविधान थःपिनिगु मंकाः राष्ट्रिय अभिष्ट जूगु धासें वइगु जेठ १४ गते तक संविधानसभा पाखें न्हूगु संविधान जारी यायेगु व शान्ति प्रकृया सफलतापूर्वक सम्पन्न यायेगु थौंया महत्वपूर्ण कार्यभार जूगु खँ न्ह्यथंनातःगु दु ।
अथेहे विज्ञप्तिइ उगु अभिष्ट प्राप्त यायेत व राष्ट्रिय कार्यभार पूवंकेत माधवकुमार नेपाल नेतृत्वया वर्तमान सरकार असफल जूगुलिं देय्या विद्यमान राजनैतिक गतिरोधया अन्त्य याना: शान्ति प्रकृयायात सार्थक निष्कर्षय् थ्यंकेत व इलय् हे संविधानसभा पाखें न्हूगु संविधान निर्माण यायेत देय्या दक्वं राजनैतिक दलत दथुइ सहमति कायम यानाः राष्ट्रिय मंका: सरकार निर्माण यायेगु विकल्प मुदगुलिं सरकारयात तत्काल राजीनामा बीत माग याःगु दु ।
विज्ञप्तिइ एनेकपा (माओवादी)या अध्यक्ष पुष्पकमल दाहाल 'प्रचण्ड', मधेसी जनअधिकार फोरमया अध्यक्ष उपेन्द्र यादव, नेकपा (एकीकृत)या अध्यक्ष ऋषिराम शर्मा कट्टेल, नेपाल सदभावना पार्टीया अध्यक्ष सरिता गिरी, नेपाली जनता दलया अध्यक्ष हरिचरण साह, राष्ट्रिय जनमुक्ति पार्टीया अध्यक्ष एम.एस. थापा, नेपाः राष्ट्रिय पार्टीया अध्यक्ष डा.केशवमान शाक्य, संघीय लोकतान्त्रिक राष्ट्रिय मञ्चया अध्यक्ष कुमार लिङदेन 'मिराक', चुरेभावर राष्ट्रिय एकता पार्टी नेपालया महासचिव भुमिराज निरौला व दलित जनजाति पार्टीया अध्यक्ष विश्वेन्द्र पासवानं ल्हा:चिं तयादीगु दु ।
