सरकारं दमन याःगु धासें संसद बहिष्कार

एनेकपा (माओवादीं) सरकारं थःपिनिगु आम हड्तालया ज्याझ्वलय् दमन याःगु धासें सोमवाःया व्यवस्थापिका संसद बहिष्कार याःगु दु ।

खुक्वः तक स्थगित लिपा सोमवाः च्वंगु व्यवस्थापिका संसदया बैठकय् न्ववानादिसें माओवादी सभासद् अमिक शेरचनं माओवादीं न्ह्याकूगु शान्तिपूर्ण आन्दोलनय् सरकारं अनावश्यक बल छय्लाः दमन याःगु धासें बैठक बहिष्कार याःगु खः ।

बैठकय् न्ववानादिसें शेरचनं शान्ति र्‍यालीया नांमय् सरकारं भिजिलान्ते छय्ला आन्दोलनयात स्यंकेगु कुतः याःगु द्वपं बियादिल । वय्कलं शान्तिपूर्ण आन्दोलनय् गोलीं क्येकूपिं व स्यंकेत स्वःपिंत कारवाहीया माग यानादिल । वय्कलं न्ववायेवं माओवादी सभासद्तय्सं संसद बहिष्कार यानाः पिहावंगु खः ।

संसदया मेगू बैठक कन्हय् न्हिनसिया स्वता: इलय् च्वनीगु जूगु दु ।