माओवादीं अग्रगमनया पक्षधर शक्तितय् मंकाः मोर्चा दयेकीगु

एकीकृत नेकपा (माओवादीं) अग्रगमनया पक्षधर शक्ति दुथ्याःगु मंकाः मोर्चा गठन याइगु जूगु दु। माओवादीं संविधान निमार्ण, धर्मनिरपेक्षता व राष्ट्रिय स्वाधीनताय पक्षय् दुपिं शक्ति नाप मिले जुयाः मंकाः मोर्चा दयेकीगु निर्णय याःगु दु ।

माओवादीया पार्टी ज्याकू कोटेश्वर पेरिस डाँडाय् सोमवाः च्वंगु स्थायी समितिया बैठकं संविधान निर्माण व शान्ति प्रकृयायात तार्किक निष्कर्षय् थ्यंकेगु निंतिं मंकाः मोर्चा गठन यायेगु निर्णय याःगु खः । शान्ति व संविधानया निंतिं थःपिनिगु नेतृत्वय् राष्ट्रिय संयुक्त सरकारया माग यानाः आन्दोलन यानाच्वंगु माओवादीं आः मंकाः मोर्चा दयेकाः सशक्त आन्दोलन यायेगु रणनीतिक दयेकूगु दु ।

बैठक लिपाः पार्टी प्रवक्ता दिनानाथ शर्मां धर्मनिरपेक्षता व संघीय गणतन्त्रात्मक संविधान निर्माणया निंतिं दुगु शक्तित नाप च्वना मंकाः मोर्चा दयेकेगु निर्णय स्थायी समिति बैठकं याःगु कनादिल । वय्कलं प्रधानमन्त्रीं राजीनामा मबीकं वार्ताया वातावरण तयार मजुइगु धयादिसें प्रधानमन्त्रीं राजीनामा मब्यूतल्ले सरकार नापं छुं नं कथंया औपचारिक वार्ताय् मच्वनेगु निर्णय याःगु धयादिल । वय्कलं पार्टीं आन्दोलनयात न्ह्याकातुं तयेगु निर्णय याःगु नं धयादिल ।

अथेहे बैठकं पार्टीं न्ह्याकूगु आम हड्तालया समिक्षा याना: शान्तिपूर्ण हड्ताल सफल जूगु ठहर यासें उकीयात ग्वाहालि याःपिं दक्वसितं सुभाय् देछाःगु दु । नापं शान्ति र्‍यालीया नांमय् सत्तारुढ कांग्रेस व एमालेया युवा संगठनया कार्यकर्तातय्सं माओवादीया शान्तिपूर्ण प्रदर्शनय् आक्रमण याःगु निष्कर्ष पिकाःगु दु ।

बैठकं आम हड्तालया इलय् सहादत प्राप्त याःपिं गणेश सुवेदी, रुद्रबहादुर केसी, सहवीर विक, मोहन भुजेल, मोहनबहादुर ठकुरी, टेकबहादुर अछामी, बीरबहादुर परियार व दलबीर ओलीयात सहिद घोषणा याःगु दु ।