सहमतिया न्हापांगु शर्त प्रधानमन्त्रीया राजीनामा : भट्टराई
एकीकृत नेकपा (माओवादी)या उपाध्यक्ष डा. बाबुराम भट्टराईं प्रधानमन्त्रीया राजीनामा सहमतिया निंतिं न्हापांगु शर्त जूगुलिं थ्व सरकार नाप वार्ता जुइमफइगु धयादिल ।
सोमवाः माओवादी मू ज्याकू कोटेश्वर पेरिस डाँडाय् जूगु माओवादी स्थायी समिति बैठक लिपा पत्रकारत नाप खँल्हाबंला यानादिसें वय्कलं सरकार नाप तत्काल वार्ताया सम्भावना मदुगु धयादिल । वय्कलं प्रधानमन्त्री माधवकुमार नेपाल जनताप्रति जिम्मेवार मजूगुलिं समस्या समाधान जुइमफुगु धयादिल ।
वय्कलं सहमतिया न्हापांगु शर्त प्रधानमन्त्रीया राजीनामा जूगु धयादिसें तर प्रधानमन्त्री जनता प्रति जिम्मेवार मजुसें कुर्सीलय् प्यपुना च्वंगु द्वपं बियादिल । वय्कलं दलत दथुइ प्याकेजय् हे सहमति जुइमाःगु धयादिसें उकी दुगु खुगू बुँदाय् च्वनाः सहलह यायेमाःगु धयादिल ।
संविधानसभाया ई थप याइलाः धकाः पत्रकारतय्सं न्यंगु न्ह्यसःलय् वय्कलं थःपिनिगु नेतृत्वय् राष्ट्रिय सहमतिया सरकार गठन मजुतल्ले संविधानसभाया ई तनेमफइगु धयादिल । वय्कलं वर्तमान सरकार शान्ति व संविधान प्रति इमान्दार मजूगुलिं संविधानसभाया ई तनेगु अर्थहीन जुइगु धयादिल ।
