सरकारयात लचकता क्यनेत युरोपेली राजदूततय् इनाप
थीथी युरोपेली देय्या राजदूतत व अमेरिकी राजदूतं माओवादीं आम हड्ताल लित कयाः सहमतिया लँपु चाःगुलिं सरकरायात नं लचकता क्यनेत इनाप याःगु दु । राजदूततय्सं सहमति पाखें हे समस्या ज्यंकेमाःगु खँय् बः ब्यूसें राष्ट्रिय सहमतिया सरकार निमार्णया निंतिं वर्तमान सरकारं सहज परिस्थिति दयेकेमाःगु खँ धाःगु दु ।
सोमवाः सुथय् उपप्रधान नापं परराष्ट्र सुजाता कोइराला नाप वय्कया हे मण्डिखाटारय् च्वंगु छेँय् नापलाना अमेरिका नापं डेनमार्क, नर्वे लगायत युरोपेली देय्या राजदुततय्सं माओवादी सहितया राष्ट्रिय सहमतिया सरकार गठन यानाः शान्ति प्रकृया व संविधान निर्माण यायेगु ज्यायात ठोस निष्कर्षय् थ्यंमाःगु खँ धाःगु ख: ।
अथेहे उमिसं संविधानसभा पाखें पूर्व निर्धारित इलय् संविधान जारी यायेमफइगु लगभग पक्का जुइधुंकूगुलिं संविधानसभाया ई थप यायेगु बारे याकनं निर्णय यायेत इनाप याःगु दु । नापं राजदूततय्सं ओएचसिएचआरया क्षेत्रीया ज्याकूत बन्द यानाः येँय् जक सिमित यायेगु सरकारी तयारी प्रति असन्तुष्टि प्वंकूगु दु ।
ओएचसिचआरया बारे मन्त्री कोइरालां येँय् जक केन्द्रीत यानाः राष्ट्रिय मानवअधिकार आयोगयात बल्लाकेत्यंगु प्रतिक्रिया बियादिल । अथेहे माओवादी नागरिक पार्टीलय् रुपान्तरण मजुइकं सहकार्य यायेत थाकुइगु धयादिसें लडाकु समायोजन व व्यवस्थापनया बारे ठोस कार्ययोजना न्ह्याः वनेमाः धइगु थःपिंगु इच्चा जूगु धयादिल ।
