राजवंशीयात भाषाथुवाः, इलोहंयात चित्तधर
नेपालभाषा परिषद्या थीथी सिरपाः घोषणा
येँ (सन्ध्या टाइम्स)/नेपालभाषाया श्रीवृद्धि यायेगु ज्याय् ताःई न्ह्यवंनिसें तन मन धनं सेवा याना वयाच्वनादीम्ह नांजाःम्ह बाखं च्वमि लक्ष्मण राजवंशीयात नेपालभाषा परिषदं मानार्थ 'भाषाथुवाः' उपाधि लःल्हाइगु जूगु दु। भाजु राजवंशीं नेपालभाषां बाखं व निबन्धया तःगूमछि सफू च्वयाः व पिकयाः, बाखं दबू व बुद्धिपूर्ण सम्मान सिरपाः गुथि स्वनाः बाखं साहित्य थकायेगु निंतिं पुलांपिं व न्हूपिं बाखं च्वमितय्त नेपाःगाः दुने व पिने थ्यंक थासंथासय् ब्वना यंकाः व अन च्वंपिंत नं बाखं न्यने व च्वके याके बियाः नेपालभाषाया श्रीवृद्धि यायेगु ज्याय् तन मन धनं सेवा यानादीगु खँ परिषदं धाःगु दु ।
अथे हे परिषदं बीगु 'चित्तधर सिरपाः' थुगुसी इलोहं प्रकाशनयात लःल्हायेगु निर्णय नं याःगु दु। इलोहं प्रकाशनपाखें मस्तय् लागिं 'इलोहं' लय्पौ, ल्याय्म्हल्यासेतय् निंतिं 'पेज थ्री' बाःछिपौ, साहित्यह्यःमितय् निंतिं 'नःलि' स्वलापौ, द्विभाषां पिहां वइगु 'लाय्कू' बाःछिपौ व प्रचलित लिपिया लय्पौ 'लिपिपौ' या प्रकाशन याना वयाच्वंगु दु। लिसें इलय् ब्यलय् थीथी सफू आदि नं पिकया वयाच्वंगु दु ।
उकथं हे नेपालभाषां बाखं, समालोचना व विशेषतः निबन्ध च्वयाः व सफू पिकयादीम्ह मय्जु अपर्णा प्रधानयात थुगुसी 'ठाकुरलाल सिरपाः' लःल्हायेगु निर्णय नं याःगु दु ।
थ्व सिरपाः नेसं ११२९ दँयागु खः। परिषदं धाः कथं आः याकनं हे छगू ज्याझ्वः यासें थ्व सिरपाः लःल्हायेगु ज्या जुइ ।
