दुर्घटनाय् प्यम्ह सित
येँ (सन्ध्या टाइम्स)/उदयपुरया त्रियुगा नपाय् थौं सुथय् ट्रकं लँय् न्यासि वयाच्वंपिं निम्ह मिस्तय् क्यलाः स्याना बिउगु दु। उकी लानाः मेम्ह छम्ह मिसा घाःपाः जूगु दु। दुर्घटना लिपा स्थानीय मनूतय्सं ट्रकय् मि तसें नाराबाजी यायेवं प्रहरीं टियर ग्याँस समेत कयेके माःगु खः। दुर्घटनाय् लानाः स्थानीय २६ दँया अन्जु दनुवार ४२ दँया धनुशोभा राई सीगु खः। ३० दँया सम्झना राई घाःपाः जूगु दु। उखे म्हिगः बहनी येँया चाबली लः ल्ह्यइगु ट्यांकरं क्यलाः स्वयम्भुइ च्वनीम्ह राजु बिसंशे सीगु दु ।
नवलपरासीया मुकुन्दपुर गाविसय् नं चान्हय् ट्रक व ट्याक्सी ल्वानाः ट्याक्सीइ च्वनावंम्ह यात्रु सीगु दु। गोरख दल गणय् प्यूठ ज्या याइम्ह ३१ दँया दुम्ह धर्मराज थापा उकी लानाः सीगु खः ।
