थीथी थासय् जूगु दर्घटनाय् लानाः स्वम्ह सित
पूर्व पश्चिम राजमार्गया बेल्टार गाईघाट सतक खण्डय् ट्रकं क्यलाः निम्ह मिसा सीगु दु । गाईघाट सतक अर्न्तगत उदयपुरया त्रियुगा नगरपालिका ४ बरुवाखोलाय् सोमवाः सुथय् निम्ह मिसायात मालबहाक ट्रकं क्यःगु खः ।
ट्रकं क्यलाः निम्ह मिसाः सिवं आक्रोसित जूपिं स्थानीयतय्सं ट्रकय् मि च्याकाः ब्यूगु दु । आक्रोसित स्थानीयवासीतय्त नियन्त्रणय् कायेत प्रहरीं छगू राउण्ड टियर ग्यास क्येकूगु दु । घटना लिपा ट्रकया चालक व सहचालक फरार जूगु खँ प्रहरीं धाःगु दु ।
ना. ३. ख. ६१७५ नम्बरया ट्रकं सुथय् न्याताः इलय् क्यलाः त्रियुगा नगरपलिका-४या नीस्वदँया अञ्जु दुनवार व सुनसरी धरान जुम्ह न्यय्न्यादँया धनशोभा राई सीगु खः । दनुवार घटनास्थलय् सीगु खःसा राईयात जिल्ला अस्पताल उदयपुरय् वासः याकाच्वंगु इलय् मदुगु खः ।
अथेहे पूर्व पश्चिम राजमार्ग अर्न्तगत नवरपारासीया मुकुन्दपुर गाविस-४य् आइतवाः बहनी जूगु सवारी दुर्घटनाय् छम्ह सैनिक जवान सीगु दु । पश्चिम पाखें पूर्वय् वनाच्वंगु बा. १. झ. ५३१८ नम्बरया ट्याक्सीं दिकातःगु ना. ३. ख. १७७० नम्बरया ट्रक नाप ठक्कर नयाः दुर्घटना जूगु दु ।
दुर्घटनाय् लानाः ट्याक्सीलय् सवार गोरख दल गणया धर्मराज थारु सीगु दु । रुपन्देही सिक्टहन-९ च्वनीम्ह थारुयात भरतपुर अस्पतालय् वासः याकाच्वंगु इलय् मदुगु खः ।
