प्रमया राजीनामा लिपा जक वार्ता : माओवादी
एकीकृत नेकपा (माओवादीं) प्रधानमन्त्री माधवकुमार नेपालया राजीनामा लिपा जक वार्ता यायेगु निर्णय याःगु दु । आइतवाः पार्टीया स्थायी समितिया बैठक च्वनाच्वंगु इलय् प्रधानमन्त्री नेपालं वार्ताया निंतिं इनाप याःगु पौ वयेवं माओवादीं प्रधानमन्त्रीया राजीनामा लिपा जक वार्ता यायेगु निर्णय याःगु खः ।
बैठक लिपा पार्टी प्रवत्ता दिनानाथ शर्मां प्रधानमन्त्रीं वार्ताया निंतिं आह्वना यानादीगु कनादिसें प्रधानमन्त्रीं राजीनमा मबीकं वार्ता मजुइगु कनादिल । वय्कलं प्रधानमन्त्रीं राजीनामा बियाः सहज वातावरण दयेकेधुंकाः जक वार्ता जुइफइगु धयादिल ।
अथेहे बैठकं वैशाष २७ निस ३१ त्क सांगठनीक तयारी, जेठ १ निसें १० ता राज्य व जिल्लाय् प्रशिक्षण व जनपरिचालन यायेगु व जेठ ११ निसें येँ लगायत देय्या मूमू शहरय् जनप्रदर्शन व सभा यायेगु निर्णय याःगु खः ।
माओवदी स्थायी समितिया बैठक सोमवाः सुथय् च्याताः इलय् हानं च्वनीगु जूगु दु ।
