प्रचण्डया अभिव्यक्ति प्रति बुद्धिजीवीतय् आपत्ति
थीथी पेशाकर्मी व बुद्धिजीवीतय्सं थःपिंत भिजिलान्तेया द्वपं बियाः घेराबन्दीलय् लाकीगु धकाः एनेकपा (माओवादी)या अध्यक्ष पुष्पकमल दाहाल 'प्रचण्डं' प्वंकादीगु अभिव्यक्ति अमर्यादित जूगु धासें आपत्ति प्वंकूगु दु ।
नीन्हय्म्ह पेशाकर्मी व बुद्धिजीवीतय्सं आइतवाः छगू मंकाः विज्ञप्ति पिथसें नेपाली मतदाता व तमाम नागरिकया सम्मानय् आँच लाकीगु कथं युद्ध व धम्कीया भाय् न्वमवायेत इनाप यासें नेताया गरिमा कायम यानाः सार्वजनिक रुपय् क्षमा याचना यायेत आह्वान याःगु दु ।
माओवादी अध्यक्ष प्रचण्डं शनिवाः येँया खुल्लामञ्चय् जूगु जनसभायात सम्बोधन यानादिसें सहरी क्षेत्रय् च्वंपिं छथ्वः बुद्धिजीवीयात युद्ध चाहेजूपिं भिजिलान्तेया संज्ञा ब्यादिसें जनतां उकीया हिसाब किताब तयाः घेराबन्दी मार्फत कारवाही याइगु खँ धयादीगु खः ।
विज्ञप्तिइ शान्ति, संविधान व सहमतिया निंतिं राजनीतिक दल व सरकारयात दबाव बीत पेशागत व बौद्धिक संस्थाया संयोजनय् ग्वसाःग्वःगु शान्ति भेलाय् स्वतस्र्फुत रुपय् सतकय् कुहांवःगु जनसागर प्रति अनावश्यक लाञ्छना ब्यूसें सहरी क्षेत्रय् बसोबास याइपिं सचेत आम जनता, बुद्धिजीवी व व्यवसायी प्रति माओवादी अध्यक्षया अशोभनीय अभिव्यक्ति वःगुलिं शान्ति, संविधान, सहमति व लोकतन्त्रया मार्गय् अझ कटुता उत्तेजना अप्वयेकीगु ज्या याःगु खँ न्ह्यथंनातःगु दु ।
राष्ट्रसंघया पुलांम्ह उपमहासचिव कुलचन्द्र गौतम, नेपाल बार एसोसिएसनया अध्यक्ष प्रेमबहादुर खड्का, नेपाल चिकित्सक संघया अध्यक्ष डा. केदारनरिसंह केसी लगायत थीथी पेशागत संगसंगठनया दुजः व बुद्धिजीवीतय्सं मंकाः रुपं प्रेस विज्ञप्ति पिथंगु खः ।
