माओवादीं चीचीधंगु दलनाप सहलह
वर्तमान राजनीतिक गतिरोधया बारे एकीकृत नेकपा (माओवादीं) संविधानसभाय् दुथ्याःगु चीचीधंगु राजनीतिक दलनाप सहलह याःगु दु ।
आइतवाः माओवादी पार्टीया मू ज्याकू पेरिस डाँडाय् जूगु खँल्हाबंलाय् माओवादीं राजनीतिक गतिरोधया बाधक वर्तमान सरकार जूगु व उकीया निंतिं थःपिगु आन्दोलनय् ग्वहालि यायेत इनाप याःगु खः । थुकीया बारे माओवादी सहित गुंगू चीचीधंगु दलं शान्ति व संविधानया निंतिं सरकार बाधक जूगु धासें राष्ट्रिय सहमतिया सरकार निर्माण यायेत याकनं छगू मंकाः सहमति प्वंकीगु खँ धाःगु दु ।
माओवादीया स्थायी समितिया बैठक जुयाच्वंगु इलय् हे सःतुगु बैठकय् मधेसी जनअधिकार फोरमया अध्यक्ष उपेन्द्र यादवं वर्तमान सरकार संविधान निर्माण व शान्ति प्रकृया विरोधी जूगुलिं प्रधानमन्त्री माधवकुमार नेपालं तत्काल राजीनामा यायेमाःगु खँ धयादीगु खः । उगु इलय् नेपाल सद्भावना पार्टी (सरिता गिरी), जनता दल, जनमुक्ति पार्टी लगायत दलं नं सरकार प्रति असहमति प्वंकूसें थुकीया विकल्प मालेमाःगु खँ तःगु खः ।
बैठकय् मधेसी जनअधिकार फोरम, राष्ट्रिय जनमुक्ति पार्टी, जनता दल, दलित जनजाति पार्टी, नेपाः राष्ट्रिय पार्टी, चुरे भावर एकता पार्टी, नेपाल परिवार दल, नेपाल लोकतान्त्रिक समाजवादी दल व संघीय लोकतान्त्रिक राष्ट्रिय मञ्चया नेतातय् ब्वति दुगु ख: ।
