सहमति मजूसा स्थिति भयावह
नेवाः देय् दबूया धापू
येँ (सन्ध्या टाइम्स)/प्रमुख प्रतिपक्षी माओवादीया आह्वानय् जुयाच्वंगु अनिश्चतकालीन आम हडतालं ब्वलंगु स्थिति व वर्तमान अनिश्चिततायात कयाः नेवाःतय् राष्ट्रिय संगठन नेवाः देय् दबुलिं चिउताः प्वंकूगु दु ।
देय् दबूया नायः नरेश ताम्रकारं छगू वक्तव्य जारी यासें धयादीगु दु - इतिहासय् हे न्हापांखुसी जनतां थःगु सार्वभौमिक अधिकार छ्यलाः संविधान दयेकेत्यंगु अतिकं महत्वपूर्ण इलय् प्रमुख राजनैतिक दलतय् दथुया सैद्धान्तिक असहमतिया कारणं न्हूगु संविधान दयेकेगु ज्याय् नापं पंगः पिहां वःगु दु। थ्वहे अवस्था जुयाच्वन धाःसा संविधानसभाया भूमिका गौण जुइगु व उकिया वैधानिकता समेत अन्त्य जुइगु खतरा उत्पन्न जूगु दु। गुकिया कारणं लोकतान्त्रिक जन आन्दोलनं प्राप्त उपलब्धी तकं तनीगु खतरा प्रति सकलें नेवाः समुदाय चिन्तित जुयाच्वंगु दु ।
उकथं हे वर्तमान राजनैतिक समस्यायात इलय् हे समाधान याये मफयाः जारी आन्दोलन निरन्तर जुया वन धाःसा अधैर्यता व असहिष्णुतां स्थितियात उत्तेजित याना बीगु लिसें प्रतिगामी तत्वं म्हितेगु ह्वःताः चूलाकीगु व छगू पक्ष मेगु पक्षया बिरुद्ध प्रतिरोध व प्रतिशोधय् कुहां वइगु अवस्था ब्वलनाः अकल्पनीय हिंसात्मक द्वन्द्व मजुइ धाये फइ मखु व थुकिं मुलुक गृहयुद्धपाखे वनीगु खतरा नं झीगु न्ह्यःने दु।
थज्याःगु भयानक व भयावह स्थिति वयेके मबीत हाल जारी अन्यौलपूर्ण सन्त्रासया अवस्था पूर्णरुपं अन्त्य जुइमाः। राजनैतिक दलतय् दथुइ राष्ट्रिय सहमति कायम यानाः वर्तमान गतिरोधया अबिलम्ब अन्त्य यासें समस्या समाधानया उपाय मालेत नेवाः देय् दबुलिं माग यानाच्वना। लिसें शान्ति प्रकृयायात तार्किक निष्कर्षय् थ्यंकाः लोकतान्त्रिक गणतन्त्र, संघीय राज्य, समावेशीय शासनप्रणाली, धर्मनिरिपेक्ष राज्य सहितया नेवाः स्वायत्त राज्य सुनिश्चित जूगु संविधान इलय् हे पिथने फइगु वातावरण दयेकेत नं सकलें राजनीतिक दलतय्त इनाप यानाच्वना ।
