प्रधानमन्त्रीं राजीनामा बी ला?
येँ (सन्ध्या टाइम्स)/माओवादीं न्ह्याकाच्वंगु आमहडताल लित काःसां प्रधानमन्त्री माधव नेपालं राजीनामा बीगु छाँट धाःसा अझ नं पिहां मवःनिगु खँ विज्ञ सूत्रतय्सं धाःगु दु। वय्कःयात राजीनामा बीमाःगु आवश्यकता मदु धकाः एमाले दुनेया केपी ओली गुट व कांग्रेस दुनेया अर्जुननरसिंह केसी पुचलं गाक्क दवाव बियाच्वंगु दु। सूत्रया कथं उकुन्हु हडतालजःसि ओली गुटया छुं मनूत चछिन्हिछि हे वालुवाटारय् च्वनाः प्रमयात साथ बीगु व युथ फोर्स परिचालन यायेगु ज्या यानाच्वंगु खः ।
माओवादीं आम हडताल लित कायेधुंकाः आः प्रधानमन्त्रीया राजीनामा कायेगु ज्या थःपिंसं याना बी धकाः विदेशी राजदूतय्सं जिम्मा कया वंगु खँ नं धाःगु दु। उकिं आम हडताल लित काः कुन्हु राजदूततय् छगू पुचलं सत्तारुढ दलया छुं नेतातय्त डिनर सःताः वार्ता याःगु खः ।
तर प्रमया राजीनामाया पहल न्ह्याःसां राजीनामा बीके न्ह्यः माओवादीं अझ नं छुं अडात त्वःते मानिगु खँ धाःगु दु। खास यानाः माओवादी समक्ष तयातःगु खुगू बुँदाया प्याकेजय् धयातः थें माओवादीं जातीय आधारय् प्रदेश निर्माणया अडान त्वःतेमाः धकाः समेत खँ वयाच्वंगु दु। यदि माओवादीं थ्व अडान त्वःतल धाःसा जक प्रधानमन्त्रीया राजीनामा वइगु खँ छथ्वःसिनं धयाच्वंगु दुसा मेथ्वःसिनं थ्व संसदया बहुमतं धस्वाःगु सरकार जूगुलिं संसदया बहुमतं हे जक थुकियात क्वःथले फइ धयाच्वंगु दु ।
प्रधानमन्त्रीं राजीनामा बीगु खँ अझ नं अनिश्चित जुयाच्वंगुलिं माओवादीपाखें अझ नं आन्दोलन तच्वयेके मालीगु खँ थन धयाहःगु दु। हानं आन्दोलन याये माली धकाः माओवादीं पिनें वयाच्वंपिं कार्यकर्ता अझ नं लित छ्वःगु मदुनि ।
