आः सरकारय् मदुगु पार्टीतय् बिस्कं मोर्चा
येँ(सन्ध्या टाइम्स)/न्हूगु संविधान व न्हूगु सरकारया विषयय् आः माओवादी संविधानसभाय् दुथ्याःगु थीथी राजनीतिक दलतय्त दुथ्याःकाः छगू मोर्चा दयेकाः न्ह्याः वनेगु बिचाः न्ह्यःने तःगु दु। म्हिगः माओवादी ज्याकुथी च्वंगु सरकारय् मदुपिं राजनीतिक दलतय्गु मुँज्याय् अज्याःगु प्रस्ताव वःगु खः ।
न्हूगु संविधान, संघीय व्यवस्थाया ग्यारेन्टी, थीथी जातीय प्रदेशया सुनिश्चितता, धर्म निरपेक्षता व राष्ट्रिय सरकार गठन धइगु मू एजेण्डा न्ह्यःने तयाः थ्व मोर्चा गठन याइगु खँ धाःगु दु ।
थ्व मोर्चाय् आःयात न्हय्गू पार्टी दुथ्याइगु खँ धाःगु दु। थ्व माग न्ह्यःने तयाः मोर्चांपाखें थीथी ज्याझ्वः याना वनीगु खँ नं धाःगु दु । मोर्चाय् सहभागी जुइपिं घटकतय् दथुइ थौं मुँज्या च्वनाः मोर्चाया एजेण्डा क्वःछी धाःगु दु ।
मोर्चाय् वयेगु लागिं नेपाः राष्ट्रिय पार्टीयात नं इनाप याना हःगु दु। तर पार्टीं मोर्चाया लागिं तयार यानातःगु एजेण्डा स्वयाः व उकी थःपिनि एजेण्डा समावेश जुइगु खःसा जक थःपिं उकी च्वने फइ वा मफइ धइगु क्वःछीगु खँ पार्टीया नायः डा. केशवमान शाक्यं कनादीगु दु ।
