नायः जाति सुम्क मच्वनेत इनाप
येँ (सन्ध्या टाइम्स)/वर्तमान राजनीतिक संकटयात समाधान यायेगु लागिं तत्काल मंकाः राष्ट्रिय सरकार गठन यायेमाःगु माग 'जातीय स्वशासनया निंतिं नायः फोरमं' याःगु दु ।
देशय् थौंकन्हय् न्ह्यानाच्वंगु द्वन्द्व धइगु देशयात म्हिगःया सामन्ती युगय् यंकेगु खः लाकि कन्हय्या न्हूगु युगय् न्ह्याका यंकेगु धइगु निगू बिचाःया ल्वापु खः धासें थज्याःगु इलय् अग्रगामी बिचाः तइपिं नायः जाति सुम्क च्वने मजिउगु खँ नं वक्तव्यय् धयातःगु दु ।
थ्व समस्याया समाधान अग्रगामी निकासपाखें जातीय उत्पीडनं मुक्त जुइगु आधारया रुपय् कयातःगु आत्मनिर्णयया अधिकार समेत दुगु जातीय स्वशासनया ग्यारेन्टी बियाः जुइमाः धकाः नं वक्तव्यय् धयातःगु दु।
देश व जनताया भाग्य निर्धारण यायेत जुयाच्वंगु थ्व आन्दोलनया झ्वलय् जनतां थःपिंलिसे सरोकार दुगु विषययात सतकं हे ल्ह्वनाः सः तयेमाः धकाः नं वक्तव्यय् न्ह्यथनातःगु दु ।
