माओवादी पाखें सिंहदरवार घेराउ / देय्न्यंकया जिल्ल प्रशासन ज्याकूथी नं घेराउ
एकीकृत नेकपा (माओवादीं) आइतवाः येँय् सिंहदरवार घेराउ याःगु दुसाः देय्न्यंक जिल्ला प्रशासन ज्याकूथी नं घेराउ याःगु दु । आइतवाः सुथय् निसें माओवादी कार्यकर्तातय्सं सिंहदरवारया प्यंगूलिं गेटं घेराउ याःगु खः । मन्त्री व कर्मचारीतय्त मू प्रशासनिक ज्याकूथी दुहांवनेमबीगु रणनीतिक कथं घेराउ याःसां छुं मन्त्रीत व उच्च सरकारी अधिकारीत सुथय् हे सिंहदरवार थ्यंगु खः । अथेहे माओवादीं देय्न्यकया जिल्ल प्रशासन ज्याकू धर्ना व घेराउ याःगु दु । धर्नाया कारणं देय्न्यंकया जिल्ल प्रशासनया ज्याखँ ठप्प जूगु दु ।
घेराउया झ्वलय् येँया माइतीघर मण्डलाय् माओवादीया व प्रहरी दथुइ ल्वापु जूगु खः । माओवादी कार्यकर्तातय्सं प्रदर्शनया झ्वलय् छम्हेसित भिजिलान्ते धासें दायेत्यंगु इलय् प्रहरीं हस्तक्षेप यायेवं ल्वापु जूगु खः । प्रदर्शनकारी व प्रहरी दथुइ अप्पां क्येका: नं ल्वापु जूगु खःसा लिपा प्रहरीं स्थिति नियन्त्रणय् कायेत छुं राउण्ड अश्रुग्यास प्रहार याःगु खः ।
ल्वापुइ लाना प्रहरी डिएसपी नापं स्वम्ह प्रहरी घाःपाः जूगु दुसाः माओवादी पाखे छगू दर्जनं मल्यक्क घाःपाः जूगु दु । अथेहे माओवादीं एभीन्युजया क्यामरा म्यान रविन्द्र श्रेष्ठयात दयाः वयाः क्यामरा खोसे याःगु दु ।
अथेहे माओवादीं निम्ह मनूयात छेँया च्वयेय् नं गोलीं क्येकूगु धासें नियन्त्रणय् काःगु दु । ज्वंपिं निम्ह राष्ट्रिय अनुसन्धानया कर्मचारी जूगु व निम्हेसितं राष्ट्रिय मानवअधिकार आयोगयात लःल्हाःगु दु । नापं माओवादी प्रदर्शनय् खुकुरी ज्वना घुसपैठ याःगु द्वपनंय् माओवादीं मेम्ह छम्हेसित नं ज्वंगु दु ।
