प्रधानमन्त्रीं वार्ताय् वयेत माओवादीयात पौ च्वइगु
प्रधानमन्त्री माधवकुमार नेपालं एकीकृत नेकपा (माओवादी)यात सहमति पाखें समस्या ज्यंकेत वार्ताय् वयेत पौ च्वइगु जूगु दु ।
आइतवाः नेपाल उद्योग वाणिज्य महासंघ व नेपाल चेम्बर अफ कमर्सया प्रतिनिधिमण्डनाप जूगु खँल्हाबंलाय् उद्योग व्यवसायीतय्सं सरकारं लचकता क्यनाः वार्ता पाखें सहमति यायेत इनाप याःगु खः । लिसःलय् प्रधानमन्त्री नेपालं थौं हे माओवादी अध्यक्ष पुष्पकमल दाहाल 'प्रचण्ड'यात पौ च्वयाः वार्ताया निंतिं इनाप यायेगु कनादिल ।
खँल्हाबंलाय् नेपाल उद्योग वाणिज्य महासंघया अध्यक्ष कुशकुमार जोशीं सरकार प्रमुखया हैसियतं राजनीतिक समस्या समाधान यायेत प्रधानमन्त्रीयात इनाप यानादीगु खः । प्रधानमन्त्री नेपालं थः समस्याया वाधाक मजूगु धयादिसें पुलांगु सम्झौता पालना याकेत माओवादीयात दबाव बीगु व माओवादीया सेना व अर्ध सैनिक संरचना भंग याकेगु जिम्मा उद्योग व्यवसायीतय्त कायेत इनाप यानादिसें थुकीया जिम्मा काःसा थः समाधान बीत तयार जूगु धयादिल ।
प्रधानमन्त्री निवास बालुवाटारय् जूगु खँल्हाबंलाय् व्यापकारीतय्सं देय् भयानक दुर्घटना लायेफुगु सम्भावना दुगु धासें अकल्पनीय दुर्घटनापखें व्यापार व्यवसाय जक मजुसें देय्या भविष्यया समस्या ब्वलंगु खँ प्रधानमन्त्री समक्ष तःगु खः ।
