हड्ताल लित गतिरोध अन्त्यया निंतिं महत्वपूर्ण पलाः

एनेकपा (माओवादीं) यानाच्वंगु आम हड्ताल लितकायेगु घोषणा याना: राजनीतिक गतिरोध अन्त्यया निंतिं महत्वपूर्ण पला ल्ह्वंगु खँ अमेरिका लगायत यूरोपेली युनियनया थीथी देय्या कुटनीतिज्ञतय्सं धाःगु दु ।
संचवाः छगू मंकाः विज्ञप्ति पिथंसें अज्याःगु देय्या कुटनीतिज्ञतय्सं माओवादीं आम हड्ताल लितकाःगु घोषणायात लसकुस याःगु दु । उमिसं बांलागु विश्वासया साथ वार्ता सुरु यायेत व वर्तमान संकटपाखें दक्वसितं फाइदा जुइकथं सफल निष्कर्षय् थ्यंकेत आवश्यक लचकता नालेत इनाप याःगु दु ।

नेपाः स्थित युरोपेली युनियनया नर्वे व स्वीट्जरल्याण्ड नापं अमेरिकी राजदूतं थुगु विज्ञप्ति पिथंगु खः ।