आः पला ल्ह्वनेगु पाः सरकारया : प्रचण्ड

एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' माओवादीं आम हड्ताल लित कयाः छगू वातावरण निर्माण यानाःगु व आः पाः सरकारया जूगु खँ धयादीगु दु । वय्कलं आः सरकारं छु पला ल्ह्वनी वहे आधारय् वार्ता यायेगु वा मयायेगु बारे निर्णय यायेगु धयादिल ।

माओवादीं संचवाः येँया खुल्लामञ्यय् याःगु जनसभायात सम्बोधन यानादिसें प्रचण्डं थःपिंसं ई कथं आन्दोलनया मोर्चायात जनभावना कथं हिलाःगु खँ न्ह्यथंनादिसें थुगुसी नं आन्दोलनया मोर्चा जक हिलाःगु धयादिल । वय्कलं सरकारया विरुद्ध आन्दोलन आः नं जारी जूगु धयादिसें निन्हु तक नं सरकारं छुं सकारात्मक पला मल्ह्वंसा: मेगू तःच्वःगु आन्दोलन यायेगु ख्याच्वः बियादिल । खुन्हुन्यंकया आम हड्ताल फिल्मया ट्रेलरजक जूगु धयादिसें सरकारं छुं पलाः मल्ह्वंसा: पूवंक नाटक क्यनाबीगु धयादिल ।

नेपाःया दकलय् शान्ति प्रिय व लोकतान्त्रिक पार्टी माओवादी हे जूगु दावी यानादिसें वय्कलं सुयां दबावय् वयाः आन्दोलन लितमकायाःगु स्पष्ट यानादिल । वय्कलं थीथी ख्यःया सकारात्मक सुझावयात थःपिंसं गम्भीर सहलह यायेगु यानाःगु जुसां अन्मित निर्णय पार्टीया थःगु हे जुइगु धयादिल ।

खुन्हुन्यंकया आम हड्ताल अभुतपूर्व रुपं सफल जूगु धयादिसें वय्कलं थुकी टायर मच्याकूगु, रेलिङ मस्यंकूगु व लखौं जनताया ब्वति दुगुलिं आन्दोलन ऐतिहासिक जूगु धयादिल । वय्कलं येँय् छेँ देय्काः च्वंपिं बुद्धिजीवी धाःपिसं शान्तिया पक्षय् वा युद्धया पक्षय् निर्णय याकनं यायेत ख्याच्वः बियादिसें अथे मयासा गांगांमं विद्रोहया ज्वाला पिहांवइगु धयादिल ।

अथेहे शुक्रवाःया शान्ति र्‍यालीलय् छुं बुद्धिजीवी, कलाकार व शान्तिया पक्षय् जनता दुगु खःसां अनं भिजिलान्ते व गुण्डात छय्गुलिं थाय् थासय् ल्वापु जूगु दावी यानादिल । वय्कलं माओवादी आतंककारी खः, प्रचण्डयात फाँसी ब्यूगु धकाः नारा थ्वयेकाः वःपिं गुकथं शान्ति प्रेमी जुइ व अथे धकाः नारा थ्वयेकाः शान्ति वइलाः धकाः न्ह्यसः तयादिल ।

सभायात माओवादी नेतात सर्वोत्तम डंगोल व अमृता थापां नं सम्बोधन यानादीगु खः । खुन्हुन्यंकया आम हड्ताल लितकयाः संचवाः माओवादीं देय्न्यंक जनसभा ग्वसाः ग्वःगु खः ।