शान्ति र्यालीया कारणं आम हड्ताल लित : कांग्रेस
नेपाली कांग्रेसं देय्यन्यंक जूगु शान्ति र्यालीया दबावया कारणं माओवादीयात आम हड्ताल लितकायेत तःधंगु नैतिक दबाव ब्वलंगु खँ धाःगु दु । कांग्रेसं शान्ति र्यालीलय् ब्वति का:पिं दक्वसितं व ग्वसाः खलयात नं सुभाय् ब्यूगु दु ।
शनिवाः कांग्रेस कार्यवहाक सभापति सुशील कोइरालां छगू विज्ञप्ति पिथनादिसें हड्ताल पाखें आम नागरिकया दैनिक जीवनय् प्रत्यक्ष सरोकार तइगु आधारभूत आवश्यकताया आपूर्ति अवरुद्ध जूगु व देय्या आर्थिक विकासया गतिलय् तसकं नकारात्मक प्रभाव लाःगु अवस्था क्वचायेकेत शुक्रवाः देय्न्यंकया याःगु शान्ति र्यालीं माओवादीयात आम हड्ताल लितकायेत तःधंगु दवाव ब्वलंगु खँ न्ह्यथंनातःगु दु ।
अथेहे विज्ञप्तिइ कांग्रेस गवलें नं ऐतिहासिक जनआन्दोलनया उपलब्धियात छखे लाकीगु, लोकतन्त्रया मूल्य मान्यतायात अवमूल्यन यायेगु व अन्तरिम संविधानं व्यवस्था याःगु पद्धति व प्रकृयायात कमजोर यायेगु कथं छुं नं गतिविधिनाप सहमत जुइ मफइगु खँ न्ह्यथंनातःगु दु ।
नापं शान्ति प्रकृयायात अपेक्षित निष्कर्षय् थ्यंकेत व संविधान निर्माणया निंतिं कांग्रेस सहमति, सहकार्य व एकताया आधारय् वार्ता पाखें समाधान मालेगु खँय् दृढतावूर्वक न्ह्यवनाच्वंगु खँ धाःगु दु ।
