प्रधानमन्त्री पाखें माओवादीयात सुभाय्
प्रधानमन्त्री माधवकुमार नेपालं आम हड्ताल लितकाःगु निंतिं माओवादीयात सुभाय् बियादीगु दु । वय्कलं माओवादीया थ्व पलाखं संवाद, सहमति व सहकर्याया लँपुइ ग्वाहालि जुइगु विश्वास प्वंकादीगु दु ।
माओवादीं शुक्रवाः बहनी आम हड्तालया ज्याझ्वः लितकायेवं शनिवाः सुथय् प्रधानमन्त्री नेपालं छगू विज्ञप्ति पिथनादिसें शान्ति प्रकृयायात पूर्णता बीत व न्हूगु संविधान च्वयेगु ज्याय् दलतय् सहमति व सहकार्य बिना सम्भव मजूगु धयादिसें अनावश्यक हठ त्व:ता: दक्वसितं मान्य जुइगु सहमतिलय् वयेगु बाहेकया मेगू विकल्प मदुगु धयादिल ।
विज्ञप्तिइ असहिष्णु क्रियाकलापं झीत सहमति पाखे मखसें विमति पाखे व सहकार्य पाखे मखसें बेमेल पाखे यंकीगु धयादिसें वय्कलं माओवादीयात राजनीतिक दलत दथुइया सहमति संवैधानिक मान्यता व लोकतन्त्रया आधारभूत मूल्यया आधारय् दक्वं समस्याया समाधान मालेगु पाखे न्ह्याः वनेत इनाप यानादीगु दु ।
अथेहे शान्ति प्रकृयायात पूवंकेत, संविधान निर्माण यायेगु वातावरण सुनिश्चिता, माओवादीया नागरिक पार्टीलय् रुपान्तरण, माओवादी लडाकुया समायोजन व पुनःस्थापना, वाईसीएलया अर्धसैन्य संरचना भंग, छेँबुँ लितबीगु लगायत शान्ति प्रकृयानाप स्वाःगु ज्यात पूवंकाः राष्ट्रिय सहमति कायम यायेत राजनीतिक दलत सक्षम जुइगु विश्वास प्वंकादिल ।
