आः सरकारं ज्या यानाः क्यनी : सुजाता
उपप्रधानमन्त्री नापं परराष्ट्रमन्त्री सुजाता कोइरालां माओवादीं थःगु आम हड्तालया ज्याझ्वः लितकायेधुंकाः आः सरकारं ज्या यानाः क्यनीगु दाबी यानादीगु दु ।
शनिवाः थःगु मण्डिखाटारय् च्वंगु छेँय् न्हय्गू एसीयाली देय्या राजदूतनापया खँल्हाबंला लिपा पत्रकारत नाप खँल्हाबंला यानादिसें वय्कलं सरकारं ज्या मयाः धका थीथी ख्यलं धयाच्वंगु प्रति असन्तुष्टि प्वंकादिसें सरकारयात ज्या याये हे मब्यूगु धयादिल । वय्कलं आः सरकारं ज्या याना क्यनीगु नं धयादिल ।
थ्वहे सरकारं माओवादी लडाकुया समायोजन व व्यवस्थापन यानाः हे त्वःतिगु दाबी यानादिसें वय्कलं सरकारया दकलय् तःधंगु प्राथमिकता थ्वहे जूगु धयादिल । वर्तमान सरकारं हे माओवादी लडाकु समायोजन व व्यवस्थापन याइगु धयादिसें वयेकलं अथे मयायेकं थ्व सरकार क्वःमदलीगु धयादिल ।
राजदूतनाप जूगु खँल्हाबंलाय् थीथी देय्या राजदूततय्सं माओवादीं आम हड्ताल लितकाःगु ज्या सकारात्मक जूगु धासें उकीं राजनीतिक निकास मालेत ग्वाहालि जुइगु विश्वास प्वंकूगु खः । उमिसं दलत दथुइ सहमति व सहकार्य पाखें शान्ति प्रकृया व न्हूगु संविधान क्वचायेकेत नं इनाप याःगु खः । उगु इलय् भारत, चीन, जापान लगायत न्हय्गू एसीयाली देय्या राजदूततय् ब्वति दुगु खः ।
