माओवादीया आम हड्ताल स्थगित
एनेकपा (माओवादीं) खुन्हु लिपा थ:पिंसं यानाच्वंगु आम हड्ताल स्थगित या:गु दु । हड्तालतय् जनता जनता ल्वाकेगु षड्यन्त्र जूगु धासें माओवादीं जारी आमहड्ताल स्थागित यायेगु निर्णय या:गु ख: । शुक्रवा: बहनी च्वंगु माओवादी स्थायी समितिया बैठकं हड्ताल स्थगित यायेगु निर्णय या:गु ख: ।
बैठक लिपा पत्रकारत नाप खँल्हाबंला यानादिसें माओवादी अध्यक्ष पुष्पकमल दाहाल 'प्रचण्डं' बन्दय् जनतायात जूगु दुःख व दुःखया नाजायज फाइदा कया: जनताविरुद्ध जनतायात हे छ्यलेत वर्तमान गठबन्धन सरकारं षड्यन्त्र या:गु कारण आ:यात बन्द स्थगित या:गु कनादिल ।
वय्कलं हड्ताल स्थगित जक याना:गु स्पष्ट यानादिसें शान्ति व संविधानया निंतिं सुरु जूगु आन्दोलन जूगुलिं निकास पिहांमवसा: हानं थंज्या:गु हे आम हड्ताल यायेगु ख्याच्व: बियादिल ।
बैठकं कन्हय् माओवादीं येँ लगायत थीथी जिल्लाय् र्याली व निता: इलय् र्याली लिपा सभा यायेगु निर्णय या:गु दुसा: आइतवा: सिंहदरबार घेरे यायेगु व जिल्ला जिल्लाया सदरमुकामय् प्रशासन ज्याकू घेरे यायेगु ज्याझ्व: क्व:छिउगु दु । आइतवा: लिपाया ज्याझ्व: धा:सा: लिपा स्थायी समितिया बैठक च्वना: तय यायेगु निर्णय या:गु दु ।
माओवादीं शान्ति व संविधानया निंतिं थ:गु नेतृत्वय् राष्ट्रिय सहमतिया सरकार व उकीया निंतिं प्रधानमन्त्री माधवकुमार नेपालं राजीनामा बीमा:गु माग यासें खुन्हु न्ह्य: निसें अनिश्चितकालिन आमहड्ताल यानावयाच्वंगु ख: ।
