सुरक्षा अगंया प्रमुखत पाखें ब्रिफिङ
प्रधानमन्त्री माधवकुमार नेपालयात प्यंगूलिं सुरक्षा अगंया प्रमुखतय्सं देय्या सुरक्षा अवस्थाया बारे ब्रिफिङ याःगु दु ।
सिंहदरवारय् दुगु प्रधानमन्त्री व मन्त्रिपरिषद्या ज्याकूथी शुक्रवाः नेपाली सेनाया प्रधानसेनापति छत्रमान सिंह गुरुङ, सशस्त्र प्रहरीया महानिरीक्षक सनदकुमार शर्मा, जनपथ प्रहरीया महानिरीक्षक रामेशचन्द्र ठकुरी व राष्ट्रिय अनुसन्धान प्रमुख अशोकदेव भट्टं सुरक्षा अवस्थाया बारे ब्रिफिङ याःगु खः ।
बैठकय् गृहमन्त्री भीम रावल, शान्तिमन्त्री रकम चेम्जोङ, गृहसचिव गोविन्द कुसुम लगायतया नं ब्वति दुगु खः ।
बैठक लिपा गृहमन्त्री भीम रावलं सरकार प्रतिकारया पक्षय् मदुगु धयादिल । वय्कलं जनताया सुरक्षा यायोगु बाहेक थःपिनिगु प्रतिकार यायेगु नीति मदुगु धयादिल । वय्कलं शान्तिपूर्ण जुलुस व ज्याझ्वः याये दइगु दक्वसियां अधिकार जूगु धयादिसें लोकतन्त्रय् थंज्याःगु याये दइगु धयादिल ।
सुरक्षा अंगया प्रमुखतय् ब्रिफिङ लिपा शान्तिमन्त्री रकम चेम्जोङं प्रधानमन्त्रीया राजीनामा मुख्य समस्या मजूगु कनादिल । वय्कलं मुख्य समसया शान्ति व न्हूगु संविधान च्वयेगु जूगु धयादिसें वाइसीएलया अर्धसैन्य संरचना भंग, कब्जा यानातःगु सम्पत्ति लितबीगु ज्या जूसाः सरकार परिवर्तनया खँ जुइफइगु धयादिल ।
