सहमतिया निंतिं आह्वान
येँ (सन्ध्या टाइम्स)/माओवादीपाखें यानाच्वंगु आम हडतालयात सहमतिइ हयाः क्वचायेमाल धइगु माग यासें थौं सुथय् राजधानी येँ लगायत देय्या थीथी शहरय् शान्ति र्याली यात ।
थ्व झ्वलय् बसन्तपुली जूगु सभाय् न्ववासें नांजाःम्ह कलाकार मदनकृष्ण श्रेष्ठं जनताया समस्यायात कयाः सरकार व माओवादी निगुलिं पक्षं सहमति कायम यानाः शान्ति कायम यायेत इनाप यानादिल ।
मेम्ह कलाकार हरिवंश आचार्यं जनतां त्याका छ्वःपिं सभासद् धाःपिं जनताया नोकर खः धासें उमिसं जनतायात दुःख बी मजिउ धयादिल ।
नेपाल उद्योग वाणिज्य महासंघया नायः कुशकुमार जोशीं थःपिंसं सुयां विरोध व समर्थनय् मखुसें शान्ति व सहमतिया निंतिं थ्व ज्याझ्वः यानागु खः धासें सहमति पिकायेत थःपिंसं निन्हुया ई बियागु दु धयादिल ।
नेपाल बार एशोसियसनया अध्यक्ष प्रेमबहादुर खड्कां नं संवोधन याःगु उगु ज्याझ्वलय् गायिक आनी छोइङ्ग डोल्मां शान्तिया म्येँ हालादीगु खःसा मदनकृष्ण व हरिवंशं 'मदनबहादुर हरिबहादुर' टेलिश्रृंखलाया छकू समसायिक कुचा न्ह्यब्वयादीगु खः ।
