'मानवाधिकार आयोग लित यंकि'
येँ (सन्ध्या टाइम्स)/नेपालय् दुगु संयुक्त राष्ट्र संघीय मानव अधिकार आयोगया ज्याकू नेपालं लित यंकेत कांग्रेसं माग याःगु दु। थौं सुथय् सानेपाय् च्वंगु नेपाली कांग्रेस कार्यसमितिया मुँज्यां नेपाःया न्यागुलिं विकास क्षेत्रय् चायेकातःगु राष्ट्र संघीय मानव अधिकार आयोग (ओएचसीएचआर) या ज्याकू नेपालं चीकेगु धकाः निर्णय समेत याःगु खँ सीदुगु दु ।
नेपालय् जुयाच्वंगु आन्दोलन व माओवादीपाखें याइगु थीथी गतिविधि बारे आयोगया भूमिका निष्पक्ष मजू धासें कांग्रेस नेतातय्सं आक्रोश प्वंकूगु खः। उकिं थुकियात नेपालं चीका हे छ्वयेमाः धकाः निर्णय याःगु खः। आयोगयात नेपालं चीकेगु सम्बन्धी प्रस्ताव मन्त्रिपरिषद् बैठकय् प्रस्तुत या धकाः उपप्रधान व परराष्ट्रमन्त्री सुजाता कोइरालायात निर्देशन नं बिउगु दु। जुजु ज्ञानेन्द्रया शासनकालय् थ्व आयोग नेपालय् खडा याये हःगु खः ।
