भारत-चीन राजदूत डिनर वार्ता
येँ (सन्ध्या टाइम्स)/नेपाःया वर्तमान समस्या समाधान यायेगु खँयात कयाः म्हिगः नेपाःया निंतिं भारतीय राजदूत राकेश सुद व चिनियाँ राजदूत छिउ गुओ होंग दथुइ 'डिनर वार्ता' जूगु दु। नेपाःया निगू अतिकं महत्वपूर्ण जःलाखःला देय्या राजदूतपिनि दथुइ जूगु थ्व वार्तां निकास मालेत तःधंगु भूमिका म्हितीगु अनुमान याःगु दु। उगु डिनर वार्ता लिपा चिनियाँ राजदूत होंगं एमालेया शक्तिशाली नेता खड्ग ओलीयात नापलानादीगु खः। ओलीलिसे म्हिगः वय्कलं निघौ वार्ता यानादीगु खँ सीदुगु दु ।
थ्वहे झ्वलय् म्हिगः एमाले अध्यक्ष झलनाथ खनालं याःगु पत्रकार सम्मेलन न्ह्यः नेता खड्ग ओलीं खनालयात बांमलाक हक्कूगु खँ सीदुगु दु। यदि उगु पत्रकार सम्मेलनं खनालं प्रमया राजीनामाया 'र' जक नां काल धाःसां नं थम्हं तुरुन्त मेगु पत्रकार सम्मेलन सःताः उकियात थःपिंसं अवज्ञा यायेगु जुइ धकाः ख्याच्वः बिउगु खँ सूत्रं धाःगु दु ।
