पुं समाजया दुजःतय्त सपथ ग्रहण
येँ (सन्ध्या टाइम्स)/चित्रकार (पुं) समाजया खुक्वःगु दुजः पुचः ल्यज्यां शान्तकुमार चित्रकारयात नायः ल्यःगु दु। उगु ल्यज्यां येँ लागां च्याम्ह, थिमि लागां छम्ह, नक्वाः लागां छम्ह नापं यलं प्यम्ह व ख्वपं छम्ह दुजः नं ल्यःगु दु ।
ल्यया वःपिं सकलें दुजःतय्त ल्यज्या नायः सहनप्रकाश चित्रकारं सपथ ग्रहण याकुसें दसिपौ लःल्हानादिल।
ल्यज्याय् येँपाखें संजय, विद्या, राजभाई, केदारमान, आनन्द, कमल, अनेश व तुल्सी चित्रकारपिंत ल्यःगु खःसा थिमिपाखें मोहन, नक्वाःपाखें गोविन्द, यलपाखें रत्नमान, नारायणलाल, गीता व राजु, ख्वपपाखें सुनिल चित्रकार ल्यया वःगु खः। आः वय्कःपिनि दथुइ सहलह यानाः पद विभाजन याइगु खँ धाःगु दु ।
सपथ ग्रहण समारोह कार्यवाहक नायः श्याम चित्रकारया अध्यक्षताय् जूगु खःसा उकी नवनिर्वाचित नायः शान्तकुमार, निवर्तमान नायः पुष्प चित्रकारपिंसं न्ववानादीगु खः ।
ज्याझ्वलय् वक्तातय्सं नेवाः समाजया छगू विशिष्ट समुदाय जुयाच्वंपिं चित्रकारतय्त सकलें छप्पँ जुयाः थकाये माःगु व चित्रकारतय्सं याना वयाच्वंगु नेवाः संस्कृतिलिसे स्वाःगु परम्परागत चित्रकलाया संरक्षण यायेमाःगु बारे विशेष बः बियादीगु खः ।
